2015 йилнинг 26—28 июнь кунлари Австралиянинг Мельбурн шаҳрида ўтказилган мамлакат очиқ чемпионатида биттадан олтин ва кумуш медалга сазовор бўлган Ўзбекистон терма жамоаси аъзолари Тошкентга қайтиб келди. Бу ҳақда Ўзбекистон миллий олимпия қўмитаси матбуот хизмати хабар беради.
Яшил қитъада анъанавий тарзда ўтказиладиган мазкур нуфузли мусобақанинг бу йилги баҳсларида дунёнинг қирқдан зиёд давлати вакиллари иштирок этиб, унда Ўзбекистон шарафини ҳимоя қилган уч нафар спортчидан икки нафари совриндорлар сафидан ўрин эгаллади.
Шу йил Россияда бўлиб ўтган жаҳон чемпионатида олтин медалга сазовор бўлган Дмитрий Шокин (+87 кг) Австралияда ҳам шоҳсупанинг энг юқори поғонасига кўтарилиб, ўз вазнида дунёда тенгсиз эканлигини яна бир карра исботлаган бўлса, Жаҳон чемпионати кумуш медал совриндори, Осиё ўйинлари ғолиби Жасур Бойқўзиев финалга қадар кечган баҳсларни ғалаба билан якунлаб, кумуш медал совриндори бўлди.
Мазкур халқаро мусобақада Дмитрий Шокин ва Жасур Бойқўзиевдан ташқари 2014 йили Нанкин (Хитой)да бўлиб ўтган ўсмирлар олимпиада ўйинлари совриндори Умида Абдуллаева ҳам иштирок этди. Афсуски, Умида совриндорлар сафидан жой олмади.
Тошкент халқаро аэропортида ғолиб спортчилар Республика спорт жамоатчилиги, ОАВ ходимлари ҳамда спортчиларнинг оила аъзолари томонидан муносиб кутиб олинди.
Австралия очиқ чемпионатида 2016 йили Рио-де-Жанейро шаҳрида ўтказиладиган XXXI ёзги Олимпиада ўйинларининг йўлланмалари учун рейтинг очколар ҳам ўйналди. Ҳар бир вазн тоифасида ғолибликка эришган спортчилар 20 рейтинг очкосига эга бўлди.
Изоҳ (0)