Yaponiya sudi Okinava prefekturasidagi AQShning Futemma aviabazasi yaqinida istiqomat qiluvchi aholiga 754 million iyena (6,1 million dollar) miqdorida kompensatsiya puli to‘lash majburiyatini hukumatga yukladi. Bu haqda The South China Morning Post xabar bermoqda.
Tovon puli 2,2 mingdan ortiq yaponiyalikka to‘lanadi. Ular, uylari aviabazaga yaqin joylashgani sabab, kuchli shovqin oqibatida uyqusizlik va tushkunlikka tushib qolganliklaridan shikoyat qilgan.
Nashrning qayd etishicha, hozirgi vaqtda Tokio va Vashington aviabazani Okinavaning aholi nisbatan kam yashaydigan qismiga ko‘chirish imkoniyatlarini muhokama qilmoqda. Biroq prefektura gubernatori bunga qarshi chiqmoqda.
2010-yili Fukuoka prefekturasi Oliy sudi aviabazaga qo‘shni ekanligidan noligan fuqarolarga 369 million iyena miqdorida tovon puli to‘lash majburiyatini hukumatga yuklagandi. Shuningdek, yaponiyaliklar amerikaliklardan erta tong va yarim tundagi parvozlarni to‘xtatishni so‘ragandi, biroq bu talab qondirilmagan.
Izoh (0)