Janubiy Koreya Markaziy banki 11-may kuni qayta moliyalash stavkasi (QMS)ni 1,75 foizdan 1,5 foizgacha kamaytirdi – bu rekord darajadagi past ko‘rsatkichdir. Vedomosti.ru’ning xabar berishicha, regulyator 2014-yil avgustidan beri QMSni to‘rtinchi marta, so‘nggi uch yillikda esa yettinchi marta pasaytirmoqda.
Markaziy bankning ogohlantirishicha, mamlakatda tarqalgan Yaqin Sharq respirator sindromi koronavirusi (MERS) iste’mol talabiga tahdid solmoqda. Bank MERS’ni “iqtisodiy prognozdagi eng keng ko‘lamli o‘zgaruvchi” deb atadi.
Janubiy Koreya hukumati ma’lumotlariga ko‘ra, 2015-yil may oyida mamlakat eksporti hajmi 10,9 foizga qisqargan edi. Bu 2009-yil avgustidan beri qayd etilgan eng past ko‘rsatkichdir – o‘shanda global moliyaviy inqiroz sabab ko‘rsatkich 20 foizga qisqargandi.
May oyidagi tushkunlikka Xitoy iqtisodiyoti o‘sishining sekinlashuvi, jahon bo‘ylab neft narxining arzonlashuvi va may oyidagi ish kunlari soni kamligi sabab qilib ko‘rsatilgandi. Markaziy bank bayonotiga ko‘ra, ayni damda eksport ko‘rsatkichlarining tushishi tezlashgan, MERS epidemiyasi sabab ichki iste’mol ko‘rsatkichlari ham pasayishni boshlagan.
Markaziy bank raisi Li Chjuyolning so‘zlariga ko‘ra, kasallik tarqalishi sabab Janubiy Koreya yalpi ichki mahsuloti bo‘yicha 2015-yil prognozlari pasaytirilishi mumkin. Amaldagi prognoz bo‘yicha YaIM hajmi yil davomida 3,1 foizga o‘sishi kerak, yangi prognoz ko‘rsatkichlari iyul oyida e’lon qilinadi.
Janubiy Koreyada MERS yuqishi bilan bog‘liq ilk holat 20-may kuni qayd etilgandi. Hozirgacha kasallik 122 kishiga yuqqan, 3,8 ming kishi karantinga olingan, to‘qqiz bemor vafot etgan.
Izoh (0)