Xitoy huquqni muhofaza qilish organlarining sobiq boshlig‘i umrbod ozodlikdan mahrum etildi

Xitoy kommunistik partiyasi Siyosiy byurosining huquqni muhofaza qilish va maxsus xizmat organlari faoliyatini muvofiqlashtirish masalalari bo‘yicha sobiq a’zosi Chjou Yunkan poraxo‘rlik, xizmat mansabini suiiste’mol qilish va davlat sirini oshkor etish jinoyatlarini sodir etganlikda aybdor deb topilib, umrbod ozodlikdan mahrum etildi. Bu haqda “TASS” xabar bermoqda.

Bundan tashqari, Tyantszin shahri sudi qaroriga asosan, Chjou Yunkan siyosiy huquqlardan ham umrbod mahrum etildi, mol-mulki esa musodara qilinadi. Yunkan o‘ziga qo‘yilgan ayblarni tan olib, amalga oshirgan jinoyatlari “partiya ishiga zarar yetkazgani va jamiyatga salbiy ta’sir qilgani”ni aytgan.

Tergov ma’lumotlariga ko‘ra, Chjou Yunkan umumiy 130 million yuan (21 million dollardan ortiq) miqdorida pora olgan. U mazkur mablag‘ evaziga, xizmat mansabidan foydalanib, U Bin, Din Syuefen, Ven Sishan, Chjou Xao va Szyan Szemin kabi shaxslarga 2,1 milliard yuan (343 million dollardan ortiq) miqdorida noqonuniy daromad olishga yordam bergan.

Chjou Yunkan so‘nggi o‘n yillikda Xitoyda ayblov hukm chiqarilgan eng yuqori martabali partiya va davlat arbobidir.