Fransiya bosh vaziri Manuel Vals 11-iyun, payshanba kuni o‘z bolalarini hukumat samolyotida parvoz qildirgani uchun jarima to‘lamoqchi ekanligini ma’lum qildi, deb yozadi “RIA Novosti”. U hukumat samolyotida 6-iyun, shanba kuni Berlindagi Chempionlar ligasi final bahsini tomosha qilish uchun oilasining bir nechta a’zolari bilan birga uchgan edi.
Avvalroq Vals bu xatti-harakati uchun siyosiy raqiblari tanqidiga uchragan edi. Hukumat rahbarining sotsialist hamkasblari uning xatti-harakatini chap oriyentatsiyadagi siyosatchi uchun nomaqbul deb atadi.
Fransiya OAVlari yozishicha, Falcon hukumat samolyotida Valsning yordamchi va qo‘riqchilaridan tashqari, ikki o‘g‘li ham bo‘lgan. OAVlar hisob-kitoblariga ko‘ra, parvoz qiymati taxminan 19 ming yevroni tashkil etgan.
Sayohat bosh vazirning rasmiy kun tartibida ham bo‘lmagan. Valsning o‘zi Berlinga UEFA rahbari Mishel Platini taklifi bilan borganini aytdi.
“Shunday bo‘lsa-da, men fransiyaliklar reaksiyasini tushunaman, xatti-harakatlarim qat’iy qoidalarga muvofiq bo‘lishi kerak. Barcha shubhalarni tarqatib yuborish uchun farzandlarim parvozi xarajatini to‘lamoqchiman”, — dedi Vals.
U tovon puli 2500 yevro bo‘lishini ma’lum qildi.
Izoh (0)