“O‘zneftmahsulot” AK qo‘li ostida barcha zarur neft mahsulotlari kerakli miqdorda mavjud. Shu jumladan, “Toshshahartransxizmat” AK transport vositalarini uzluksiz va cheklashlarsiz ta’minlash uchun dizel yonilg‘isiga ham ega. Bu haqda kompaniya matbuot xizmatiga tayanib, “12news.uz” xabar bermoqda.
Xabarda yozilishicha, so‘nggi paytlarda ba’zi internet-nashrlarda Toshkent shahridagi jamoat transporti vositalari uchun dizel yonilg‘isi yetishmasligi kuzatilayotgani, shuningdek, uni yetkazib berish 30 foizga kamaygani haqida “Toshshahartransxizmat” AK saytidagi rasmiy ma’lumotga tayangan holda xabarlar paydo bo‘ldi.
“Ushbu bayonotga javoban ma’lum qilamizki, hukumatning 2004-yil 5-fevralidagi qaroriga muvofiq, “O‘zbekneftgaz” AK yonilg‘i yetkazib berishni shartnoma majburiyatlari asosida 100 foizli oldindan to‘lov bo‘yicha amalga oshirmoqda. Xususan, bugungi kunda “Toshshahartransxizmat” AK korxonalariga yonilg‘i yetkazib berish amaldagi shartnomada ko‘zda tutilgan summaga mos tushadigan hajmda yetkazib berilmoqda”, — deyiladi kompaniya xabarida.
Eslatib o‘tamiz, avvalroq poytaxt jamoat transportini boshqaruvchi “Toshshahartransxizmat” kompaniyasi yo‘lovchilarni avtobus reyslari oralig‘idagi vaqt ko‘payishi mumkinligi haqida ogohlantirgan va bu yoqilg‘i yetkazib berilishining 30 foizga qisqarishi bilan bog‘liqligi aytilgan edi.
Izoh (0)