Amerikalik investor va milliarder Uorren Baffet rahbarlik qiladigan Berkshire Hathaway kompaniyasi 2025-yilning ikkinchi choragi uchun moliyaviy hisobot e’lon qildi. Unga ko‘ra, kompaniyaning Apple’dagi ulushlari 6,7 foizga kamaygani ma’lum bo‘ldi. Bu haqda “RBK” xabar berdi.
Hisobotda ma’lum qilinishicha, Baffet Apple va Bank of America’dagi ulushlarini qisqartirgan, biroq qurilish, energetika hamda alkogol sanoatidagi investitsiyalarni oshirgan. Shuningdek, u sug‘urta giganti “UnitedHealth Group” aksiyalarini xarid qilib, o‘zining sarmoya portfeliga yangi kompaniyalarni qo‘shgan. Hisobotga ko‘ra:
- Berkshire Hathaway’ning umumiy aktivlari qiymati yilning ikkinchi choragida 257,5 milliard dollar bo‘lib, avvalgi chorakka nisbatan biroz kamayish qayd etilgan;
- moliyaviy sektor portfelning 41,3 foizini tashkil etib, eng katta ulushga ega. Keyingi o‘rinlarda axborot texnologiyalari (23,8 foiz), iste’mol tovarlari (16,5 foiz), energetika (11,1 foiz) va sog‘liqni saqlash (2,5 foiz) turibdi;
- Apple ulushi 22,3 foizgacha kamaygan bo‘lsa-da, u baribir sarmoyaning eng yirik qismi hisoblanmoqda. Ikkinchi va uchinchi o‘rinlarda American Express (18,8 foiz) hamda Bank of America (11,1 foiz) qayd etilgan. Coca-Cola esa to‘rtinchi o‘ringa tushgan.
Quyida Berkshire Hathaway kompaniyasi tomonidan amalga oshirilgan yangi xaridlar keltirilgan:
- UnitedHealth Group — 1,57 milliard dollar.
- Lamar Advertising — 142 million dollar.
- Allegion (xavfsizlik texnologiyalari) — 112 million dollar.
Ulushi oshirilgan kompaniyalar esa quyidagilar:
- Lennar Corp (qurilish) — 256 foiz o‘sish (780 million dollar);
- Pool Corp (basseyn uskunalari) — 136 foiz o‘sish (1 milliard dollar);
- Chevron — 17,5 milliard dollar;
- Constellation Brands (alkogol) — 2,2 milliard dollar.
Ulushi kamaytirilgan kompaniyalar:
- Apple — 6,7 foiz (57,4 milliard dollar)
- Bank of America — 28,6 milliard dollar
Ma’lumot o‘rnida, Uorren Baffet hozirda 94 yoshda. U yil oxirigacha Berkshire Hathaway bosh direktori lavozimini tark etishi kutilmoqda. Uning o‘rnini Greg Ebel egallashi rejalashtirilgan. Baffet esa kompaniya kuzatuv kengashi raisi sifatida qoladi.
Izoh (0)