«Ўзнефтмаҳсулот» АК қўли остида барча зарур нефть маҳсулотлари керакли миқдорда мавжуд. Шу жумладан, «Тошшаҳартрансхизмат» АК транспорт воситаларини узлуксиз ва чеклашларсиз таъминлаш учун дизель ёнилғисига ҳам эга. Бу ҳақда компания матбуот хизматига таяниб, «12news.uz» хабар бермоқда.
Хабарда ёзилишича, сўнгги пайтларда баъзи интернет-нашрларда Тошкент шаҳридаги жамоат транспорти воситалари учун дизель ёнилғиси етишмаслиги кузатилаётгани, шунингдек, уни етказиб бериш 30 фоизга камайгани ҳақида «Тошшаҳартрансхизмат» АК сайтидаги расмий маълумотга таянган ҳолда хабарлар пайдо бўлди.
«Ушбу баёнотга жавобан маълум қиламизки, ҳукуматнинг 2004 йил 5 февралидаги қарорига мувофиқ, «Ўзбекнефтгаз» АК ёнилғи етказиб беришни шартнома мажбуриятлари асосида 100 фоизли олдиндан тўлов бўйича амалга оширмоқда. Хусусан, бугунги кунда «Тошшаҳартрансхизмат» АК корхоналарига ёнилғи етказиб бериш амалдаги шартномада кўзда тутилган суммага мос тушадиган ҳажмда етказиб берилмоқда», — дейилади компания хабарида.
Эслатиб ўтамиз, аввалроқ пойтахт жамоат транспортини бошқарувчи «Тошшаҳартрансхизмат» компанияси йўловчиларни автобус рейслари оралиғидаги вақт кўпайиши мумкинлиги ҳақида огоҳлантирган ва бу ёқилғи етказиб берилишининг 30 фоизга қисқариши билан боғлиқлиги айтилган эди.
Изоҳ (0)