O‘zbekistonda mamlakat hududiga Yaqin Sharq respirator sindromi (YaShRS/MERS) koronavirusi olib kelinishi va tarqalishiga yo‘l qo‘ymaslik bo‘yicha choralar ko‘rilmoqda, deb yozadi “Gazeta.uz” Sog‘liqni saqlash vazirligiga tayanib.
Barcha xalqaro aeroportlarda mamlakatga kirib kelayotgan yo‘lovchilarni tibbiy monitoringdan o‘tkazish tashkil qilindi, bunda zamonaviy qurilmalar yordamida yo‘lovchilarning harorati o‘lchanadi. Yaqin Sharq va Koreya Respublikasidan uchib kelayotgan aviayo‘lovchilar ayniqsa e’tibor bilan tekshirilmoqda.
Mamlakatda o‘tkir respirator infeksiyalari va zotiljam holatlari ustidan epidemiologik nazorat olib borilmoqda. Barcha infeksion kasalxonalarda koronavirusga chalingan deb gumon qilinganlarni yotqizish va davolash uchun sharoitlar tayyorlab qo‘yilgan. Yaqin Sharq mintaqasiga uchib ketayotgan shaxslar uchun shaxsiy xavfsizlik choralariga rioya qilish bo‘yicha eslatmalar ishlab chiqilgan.
Nashr eslatishicha, may oyining ikkinchi yarmida Koreya Respublikasi Sog‘liqni saqlash vazirligi MERS koronavirusi bilan kasallanish bo‘yicha ilk holatlar haqida e’lon qildi. So‘nggi ikki hafta ichida koronavirus tezlik bilan tarqalmoqda. 5-iyun holatiga ko‘ra, Koreyada 41 kishi kasallandi, ularning to‘rt nafari vafot etdi (8-iyun holatiga ko‘ra, qurbonlar soni olti kishiga yetdi).
Izoh (0)