O‘zbekiston davlat san’at muzeyida O‘zbekiston xalq artisti Mukarrama Turg‘unboyeva ijodi va faoliyatiga bag‘ishlangan “San’atga baxshida umr” deb nomlangan ko‘rgazma tashkil etildi. Review.uz’ning xabar berishicha, taniqli raqqosa 31-may kuni 102 yoshga to‘lgan bo‘lardi.
Ko‘rgazma ekspozitsiyasida san’atkorning raqs liboslari, shaxsiy buyumlari, fotosuratlar, albomlar, konsert afishalari, turli esdalik buyumlar, video materiallarga keng o‘rin berilgan.
Mukarrama Turg‘unboyeva Farg‘onada tug‘ilgan. Pedagogika bilim yurtini tamomlaganidan so‘ng, Samarqand davlat musiqali teatrida ishlagan. Unga raqs sirlarini Usto Olim Komilov va Tamaraxonim o‘rgatgan. “Paxta” deb nomlangan o‘zining ilk raqsini Mukarrama Turg‘unboyeva 1937-yilda sahnalashtirgan.
Ustoz san’atkor 1957-yili “Bahor” raqs ansamblini tashkil etgan. U sahnalashtirgan “Tanovar”, “Rohat”, “Pilla”, “Munojat”, “Katta o‘yin”, “Paxta”, “Xumor” kabi ikki yuzdan ortiq jozibador raqs o‘zbek san’atining oltin xazinasidan o‘rin olgan.
O‘zbekiston Prezidenti tashabbusi bilan Mustaqillik yillarida Mukarrama Turg‘unboyevaning ijodi yuksak qadrlanib, u “Buyuk xizmatlari uchun” ordeni bilan mukofotlangan.
Izoh (0)