O‘zbekiston Respublikasi Madaniyat va sport ishlari vazirligi Respublika xalq ijodiyoti va madaniy-ma’rifiy ishlar ilmiy-metodik markazi tomonidan Samarqandda “Ashula va raqs ansambllari” respublika ko‘rik-tanlovi g‘oliblarini taqdirlash marosimi bo‘lib o‘tdi. Bu haqda Markaz matbuot xizmati xabar bermoqda.
“Ashula va raqs ansambllari” respublika ko‘rik-tanlovida 128 ta havaskorlik xalq ashula va raqs ansamblari hamda 8 ta bolalar namunali jamoalari xalq og‘zaki ijodining eng qadimiy va go‘zal namunalarini, asriy kuy-qo‘shiqlarni ijro etdi.
Tanlov yakunlariga ko‘ra, Samarqand viloyatining “Afrosiyob” ashula va raqs xalq ansambliga birinchi o‘rin, Qoraqalpog‘iston Respublikasi “Shug‘la” ashula va raqs xalq ansambli, Navoiy viloyati Karmana tumani “Guli” ashula va raqs xalq ansambllariga ikkinchi o‘rin nasib etdi.
Uchinchi o‘ringa Qashqadaryo viloyati Yakkabog‘ tumani “Dil navosi” ashula va raqs xalq ansambli, Andijon viloyati Andijon shahri “Gulruh” ashula va raqs xalq ansambli, Xorazm viloyati Xiva tumani “Xiva naqshlari” ashula va raqs xalq ansambllari loyiq deb topildi.
Tadbir so‘ngida tanlov g‘olib va sovrindorlari ishtirokida gala-konsert bo‘lib o‘tdi. Faol ishtirokchilarga faxriy yorliq va esdalik sovg‘alari topshirildi.
Izoh (0)