Bu yil Samarqandda “Sharq taronalari” xalqaro musiqa festivali o‘ninchi bor o‘tkaziladi. Bu haqda O‘zA xabar bermoqda.
O‘zbekistonda, jumladan, Samarqandda Vatanimiz mustaqilligining 24 yilligi arafasida o‘tkaziladigan “Sharq taronalari” o‘ninchi xalqaro musiqa festivaliga tayyorgarlik boshlandi. Festivalga tayyorgarlik ko‘rish va uni o‘tkazish bo‘yicha Samarqand viloyati hokimligi ishchi guruhi tarkibi va tadbirlar rejasi tasdiqlandi.
Shaharni festival ruhiga mos bezatish, mehmonxonalarni tayyorlash, Registon maydonida asosiy sahna va tomoshabinlar uchun o‘rindiqlar o‘rnatish, “So‘g‘diyona”, “Yoshlik” istirohat bog‘lari, “Mo‘’jiza” amfiteatrida ta’mirlash va obodonlashtirish ishlariga kirishildi. Tadbirning tantanali ochilish marosimi ommaviy sahnalarida ishtirok etadigan qatnashchilar, folklor jamoalar saralanmoqda.
Festival qatnashchilari joylashadigan mehmonxonalar, Registon maydonidagi Ulug‘bek madrasasida hamda muzeylarda “Sharq taronalari” xalqaro musiqa festivali tarixiga oid fotosuratlar, milliy musiqa asboblari, tarixiy liboslar, tasviriy va amaliy san’at asarlari, milliy hunarmandlik mahsulotlari ko‘rgazmalari tashkil etish yuzasidan vazifalar belgilab olindi.
Festival qatnashchilarining Samarqand viloyati tuman va shaharlaridagi istirohat bog‘lari, musiqa va san’at maktablarida o‘z dasturlarini namoyish etishi, yosh ijodkorlar ishtirokida mahorat mashg‘ulotlari o‘tishi uchun zarur sharoitlar yaratish choralari ko‘rilmoqda.
Festival ishtirokchilari va mehmonlarini kutib olish va mehmonxonalarga joylashtirish, ularga yuqori sifatli zamonaviy servis xizmati ko‘rsatish, gid-ekskursovod va tarjimonlar tayyorlash, viloyat bo‘ylab sayohatlar tashkil etish kabi muhim masalalar yuzasidan aniq vazifalar va ularni amalga oshiruvchi mas’ullar belgilangan. Ayni paytda mutasaddi idoralar tomonidan dastlabki yumushlar boshlab yuborildi.
Bir nechta joyda, jumladan, mehmonxonalar, Toshkent ko‘chasi va Ruhobod maydonidagi Hunarmandlar markazida aynan Sharq milliy musiqa va san’atiga oid hunarmandlik buyumlari, cholg‘u asboblari namoyishini o‘tkazishni rejalashtirilmoqda. Musiqa asboblari yasash bilan shug‘ullanuvchi sulolalar vakillari ishtirokida uchrashuvlar, yosh hunarmandlar uchun mahorat mashg‘ulotlari tashkil etiladi.
Ma’lumot uchun, 2013-yili bo‘lib o‘tgan to‘qqizinchi festivalda 56 mamlakat vakillari Registon maydonidagi sahnada o‘z milliy san’atini namoyish etgan edi.
Izoh (0)