“O‘zbekiston” xalqaro anjumanlar saroyida “Yoshlik bahori” yosh opera ijrochilari respublika ko‘rik-festivali g‘olib va sovrindorlari hamda O‘zbekiston Yoshlar simfonik orkestri ishtirokida gala-konsert bo‘lib o‘tdi. Bu haqda 12news.uz xabar bermoqda.
Madaniyat va sport ishlari vazirligi, «Kamolot» YIH markaziy kengashi, O‘zbekiston milliy simfonik, kamer va xalq cholg‘ulari orkestrlari jamoalari birlashmasi hamkorligida 11-15-may kunlari o‘tkazilgan «Yoshlik bahori» yosh opera ijrochilari respublika ko‘rik-festivalidan ko‘zlangan maqsad yosh avlodni milliy va jahon musiqasining eng nodir namunalaridan bahramand etish, ular qalbida san’atga bo‘lgan mehr va qiziqishni tobora kuchaytirishdan iboratdir.
Festivalda Qoraqalpog‘iston Respublikasi, viloyatlar va Toshkent shahridan 60ga yaqin yosh opera ijrochisi o‘z mahoratini namoyish etdi. Mazkur festival yosh opera ijrochilarini aniqlash, ularning salohiyati, ijod qirralarini ro‘yobga chiqarishi uchun zarur imkoniyatlarni yaratishdek ezgu maqsadlarga xizmat qiladi.
Besh kun mobaynida O‘zbekiston davlat konservatoriyasining muhtasham zallarida O‘zbekiston hamda jahon kompozitorlari ijodiga mansub eng sara operalardan ariyalar, romanslar, kuy-navolar yangradi. Ko‘rik-festival doirasida taniqli rejissyorlar, musiqashunoslar, kompozitorlar, vokalistlar, konsertmeysterlar ishtirokida yoshlar uchun mahorat saboqlari, muloqotlar o‘tkazildi.
O‘zbekiston davlat konservatoriyasining ikkinchi kurs talabasi Farangiz Shamsiyeva «Yoshlik bahori» yosh opera ijrochilari respublika ko‘rik-festivalida birinchi o‘ringa sazovor bo‘ldi. Mazkur oliy o‘quv dargohi talabalari Behzod Davronov ikkinchi, Angelina Ahmedova uchinchi o‘ringa loyiq deb topildi. Turli nominatsiyalar bo‘yicha ham g‘olib va sovrindorlar aniqlanib, ularga diplom va sovg‘alar topshirildi.
Konsertda o‘zbek va jahon kompozitorlarining asarlaridan namunalar yangradi.
Izoh (0)