Самарқандда «Шарқ тароналари» халқаро мусиқа фестивалига тайёргарлик бошланди

Бу йил Самарқандда «Шарқ тароналари» халқаро мусиқа фестивали ўнинчи бор ўтказилади. Бу ҳақда ЎзА хабар бермоқда.

Ўзбекистонда, жумладан, Самарқандда Ватанимиз мустақиллигининг 24 йиллиги арафасида ўтказиладиган «Шарқ тароналари» ўнинчи халқаро мусиқа фестивалига тайёргарлик бошланди. Фестивалга тайёргарлик кўриш ва уни ўтказиш бўйича Самарқанд вилояти ҳокимлиги ишчи гуруҳи таркиби ва тадбирлар режаси тасдиқланди.

Шаҳарни фестиваль руҳига мос безатиш, меҳмонхоналарни тайёрлаш, Регистон майдонида асосий саҳна ва томошабинлар учун ўриндиқлар ўрнатиш, «Сўғдиёна», «Ёшлик» истироҳат боғлари, «Мў’жиза» амфитеатрида таъмирлаш ва ободонлаштириш ишларига киришилди. Тадбирнинг тантанали очилиш маросими оммавий саҳналарида иштирок этадиган қатнашчилар, фолклор жамоалар сараланмоқда.

Фестиваль қатнашчилари жойлашадиган меҳмонхоналар, Регистон майдонидаги Улуғбек мадрасасида ҳамда музейларда «Шарқ тароналари» халқаро мусиқа фестивали тарихига оид фотосуратлар, миллий мусиқа асбоблари, тарихий либослар, тасвирий ва амалий санъат асарлари, миллий ҳунармандлик маҳсулотлари кўргазмалари ташкил этиш юзасидан вазифалар белгилаб олинди.

Фестиваль қатнашчиларининг Самарқанд вилояти туман ва шаҳарларидаги истироҳат боғлари, мусиқа ва санъат мактабларида ўз дастурларини намойиш этиши, ёш ижодкорлар иштирокида маҳорат машғулотлари ўтиши учун зарур шароитлар яратиш чоралари кўрилмоқда.

Фестиваль иштирокчилари ва меҳмонларини кутиб олиш ва меҳмонхоналарга жойлаштириш, уларга юқори сифатли замонавий сервис хизмати кўрсатиш, гид-экскурсовод ва таржимонлар тайёрлаш, вилоят бўйлаб саёҳатлар ташкил этиш каби муҳим масалалар юзасидан аниқ вазифалар ва уларни амалга оширувчи масъуллар белгиланган. Айни пайтда мутасадди идоралар томонидан дастлабки юмушлар бошлаб юборилди.

Бир нечта жойда, жумладан, меҳмонхоналар, Тошкент кўчаси ва Руҳобод майдонидаги Ҳунармандлар марказида айнан Шарқ миллий мусиқа ва санъатига оид ҳунармандлик буюмлари, чолғу асбоблари намойишини ўтказишни режалаштирилмоқда. Мусиқа асбоблари ясаш билан шуғулланувчи сулолалар вакиллари иштирокида учрашувлар, ёш ҳунармандлар учун маҳорат машғулотлари ташкил этилади.

Маълумот учун, 2013 йили бўлиб ўтган тўққизинчи фестивалда 56 мамлакат вакиллари Регистон майдонидаги саҳнада ўз миллий санъатини намойиш этган эди.