Fransiya prezidenti Fransua Olland Kuba poytaxti Gavanada aka-uka Kastrolar – Fidel va Raul bilan uchrashdi. Bu haqda Korrespondent.net xabar bermoqda.
Olland 1898-yildan beri Kubaga tashrif buyurgan ilk Fransiya prezidenti, 1980-yillardan beri Gavanaga kelgan ilk g‘arbiy yevropalik mamlakat yetakchisi bo‘ldi. Ungacha so‘nggi bor 1986-yilda Ispaniyaning o‘sha vaqtdagi bosh vaziri Felipe Gonsales Kubaga kelgandi.
Gavanaga kelgan Olland AQSHni Kuba bilan savdo qilishga nisbatan joriy etgan embargosini bekor qilish chaqirgan. Fransiya prezidentining so‘zlariga ko‘ra, AQSHning bu qarori orolning rivojiga jiddiy to‘siq bo‘lib qolgan.
Fransiyaning Liberation gazetasi muxbiri Lor Brettonning ma’lum qilishicha, Fransiya prezidenti va Fidel Kastro o‘rtasidagi muloqot bir soatga yaqin davom etgan. “Mening oldimda tarix yaratgan odam o‘tiribdi”, - dedi Olland.
Shundan so‘ng Fransiya prezidenti Fransua Olland Kubaning hozirgi yetakchisi – Raul Kastro bilan uchrashdi. Ollandning ma’lum qilishicha, Fransiya fransuz universitetlarida ta’lim olayotgan kubalik talabalar uchun stipendiyalar sonini ikki barobar oshiradi.
Izoh (0)