AQSh Markaziy razvedka boshqarmasi sobiq xodimi Jeffri Styorling Amerika razvedkasining Eron yadro dasturini barbod qilishga qaratilgan operatsiyasi haqidagi maxfiy axborotni fosh qilgani uchun 3,5 yilni qamoqda o‘tkazadi, deya xabar bermoqda “Kommersant”.
Bunday qarorni Virjiniya shtati poytaxti Aleksandriyada bo‘lib o‘tgan sud jarayonida okrug sudyasi Leoni Brinkem qabul qildi.
Yanvarda maslahatchilar ishtirokidagi sud majlisi 47 yoshli Styorlingni to‘qqizta band, jumladan maxfiy ma’lumotlarni New York Times gazetasi jurnalisti Jeyms Rayzenga berib yuborganlikda aybdor deb topgan edi. U 2000-yilda o‘tkazilgan MRB operatsiyalari haqida “Urush holati” kitobini yozgan, biroq barcha zarur axborotni Styorlingdan emas, boshqa odamlardan olganligini ta’kidlagan.
Shu bilan birga, Rayzen sudda guvoh sifatida qatnashishdan bosh tortdi va o‘z manbasi ismini aytmasligini ma’lum qildi. Kasbida ko‘rsatgan jasorati va matbuot erkinligi tamoyiliga sodiqligi uchun AQSh Gazeta gildiyasi mukofotini qo‘lga kiritgan jurnalist qamoqda o‘zi o‘tirib chiqishga tayyor edi, biroq adliya vazirligi jamoatchilik bosimi ostida uni tergov qilishni to‘xtatdi.
Izoh (0)