HP’ning sobiq bosh direktori va Respublikachilar partiyasi vakili Karli Fiorina AQSH prezidenti o‘rni uchun kurash olib borish niyatini e’lon qildi. Reuters agentligi xabariga ko‘ra, Fiorina bu haqda 4-may, dushanba kuni ABC News telekanalining “Xayrli tong, Amerika” dasturida ma’lum qilgan.
“Ha, men prezident lavozimi uchun o‘z nomzodimni qo‘ymoqchiman. Men o‘zimni ushbu lavozimga eng munosib inson deb hisoblayman, chunki iqtisodiyot aslida qanday ishlashini juda yaxshi bilaman. Men jahonni, undagi odamlarni va bu jahon qanday ishlashini tushunaman”, - dedi siyosiy arbob.
Shunday qilib, Fiorina joriy saylov kampaniyasida Respublikachilar partiyasidan prezident lavozimi uchun o‘z nomzodini qo‘yayotgan ilk ayol bo‘ldi.
3-may kuni kuni 65 yoshli neyrojarroh Ben Karson ham Respublikachilar partiyasidan AQSH prezidentligi uchun kurash olib borish niyatida ekanligini bildirgandi. Bundan tashqari, respublikachi senatorlar Ted Kruz va Rend Pol ham prezidentlik poygasida qatnashishini e’lon qilgan.
Saylovlarda Respublikachilar partiyasidan, shuningdek, Nyu-Jersi gubernatori Kris Kristi, Viskonsin gubernatori Skott Uoker, senatorlar Lindsi Grem va Marko Rubio ham nomzod sifatida ishtirok etishi kutilmoqda.
Demokratik partiyadan esa senator-sotsialist Berni Sanders, shuningdek, Hillari Klinton saylovda nomzod sifatida ishtirok etish qarorini e’lon qilgan.
60 yoshli Karli Fiorina 1999-2005-yillar davomida AQSHning yirik kompaniyalaridan biri – Hewlett-Packard (HP)ga rahbarlik qilgan va mamlakatning eng nufuzli biznesmenlaridan biri hisoblangan. 2008-yili AQSH prezidentligiga nomzod Jon Makkeynning iqtisodiy masalalar bo‘yicha maslahatchisi bo‘lgan, 2010-yili esa Kaliforniya shtatidan AQSH Kongressi senatiga saylovlarda qatnashgan, biroq demokrat Barbara Bokserga mag‘lub bo‘lgan.
Izoh (0)