HP’нинг собиқ бош директори ва Республикачилар партияси вакили Карли Фиорина АҚШ президенти ўрни учун кураш олиб бориш ниятини эълон қилди. Reuters агентлиги хабарига кўра, Фиорина бу ҳақда 4 май, душанба куни ABC News телеканалининг «Хайрли тонг, Америка» дастурида маълум қилган.
«Ҳа, мен президент лавозими учун ўз номзодимни қўймоқчиман. Мен ўзимни ушбу лавозимга энг муносиб инсон деб ҳисоблайман, чунки иқтисодиёт аслида қандай ишлашини жуда яхши биламан. Мен жаҳонни, ундаги одамларни ва бу жаҳон қандай ишлашини тушунаман», - деди сиёсий арбоб.
Шундай қилиб, Фиорина жорий сайлов кампаниясида Республикачилар партиясидан президент лавозими учун ўз номзодини қўяётган илк аёл бўлди.
3 май куни куни 65 ёшли нейрожарроҳ Бен Карсон ҳам Республикачилар партиясидан АҚШ президентлиги учун кураш олиб бориш ниятида эканлигини билдирганди. Бундан ташқари, республикачи сенаторлар Тед Круз ва Рэнд Пол ҳам президентлик пойгасида қатнашишини эълон қилган.
Сайловларда Республикачилар партиясидан, шунингдек, Нью-Жерси губернатори Крис Кристи, Висконсин губернатори Скотт Уокер, сенаторлар Линдси Грэм ва Марко Рубио ҳам номзод сифатида иштирок этиши кутилмоқда.
Демократик партиядан эса сенатор-социалист Берни Сандерс, шунингдек, Ҳиллари Клинтон сайловда номзод сифатида иштирок этиш қарорини эълон қилган.
60 ёшли Карли Фиорина 1999-2005 йиллар давомида АҚШнинг йирик компанияларидан бири – Hewlett-Packard (HP)га раҳбарлик қилган ва мамлакатнинг энг нуфузли бизнесменларидан бири ҳисобланган. 2008 йили АҚШ президентлигига номзод Жон Маккейннинг иқтисодий масалалар бўйича маслаҳатчиси бўлган, 2010 йили эса Калифорния штатидан АҚШ Конгресси сенатига сайловларда қатнашган, бироқ демократ Барбара Боксерга мағлуб бўлган.
Изоҳ (0)