Neyrojarroh Ben Karson AQSH prezidentligi uchun o‘z nomzodini qo‘yishini ma’lum qildi. U bu haqda 3-may, yakshanba kuni Florida shtatidagi WPEC-TV telekanali orqali qilgan chiqishida ma’lum qildi.
Ben Karson 2016-yilgi saylovda Respublikachilar partiyasi vakili sifatida ishtirok etishga umid qilmoqda.
“Men o‘z nomzodimni AQSH prezidenti lavozimiga ilgari surishimni e’lon qilaman”, - dedi ayni vaqtda pensiyada bo‘lgan 65 yoshli shifokor. “Siyosatchi bo‘lmasam-da, ko‘pchilik menga davlat rahbari o‘rni uchun kurashishim kerakligi haqida maslahat berdi”, - deya qo‘shimcha qildi u.
Hozirgacha senatorlar Ted Kruz va Rend Pol Respublikachilar partiyasidan AQSH prezidentligi uchun kurash olib borish niyatini bildirdi. Saylovlarda ushbu partiyadan Nyu-Jersi gubernatori Kris Kristi, Viskonsin gubernatori Skott Uoker, senatorlar Lindsi Grem va Marko Rubio ham ishtirok etishi kutilmoqda.
Demokratik partiyadan esa partiyasiz senator-sotsialist Berni Sanders, shuningdek, Hillari Klinton saylovda ishtirok etish qarorini e’lon qilgan. AQSH prezidenti Barak Obamaning fikricha, Klinton AQSHning “a’lo darajadagi prezidenti” bo‘lishi mumkin.
Izoh (0)