Toshkent shahrida 2-may kuni Markaziy Osiyo mamlakatlari o‘rtasida yapon tilida notiqlik san’ati bo‘yicha 19-tanlov o‘tkazilishi rejalashtirilmoqda. 12news.uz xabariga ko‘ra, tanlov har yili navbatma-navbat ishtirokchi mamlakatlarning poytaxtlarida bo‘lib o‘tadi.
Tanlov Yaponiyaning O‘zbekistondagi echixonasi, O‘zbekistondagi Yaponiya fuqarolari jamiyati va O‘zbekiston Savdo-sanoat palatasi ko‘magida O‘zbekiston-Yaponiya markazi, O‘zbekiston yapon tili o‘qituvchilari jamiyati, Markaziy Osiyo notiqlik san’ati tanlovi tashkiliy qo‘mitasi tomonidan o‘tkaziladi.
Tanlovda Qozog‘iston, Qirg‘iziston, Tojikiston, Turkmaniston va O‘zbekistondan jami 17 nafar talaba ishtirok etadi. O‘zbekiston nomidan Toshkent davlat sharqshunoslik instituti, Samarqand davlat chet tillar instituti va Farg‘ona “Kamolot kelajak minbari” til markazining jami besh nafar talabasi qatnashadi.
Tanlov qoidalariga ko‘ra, qatnashchilar erkin mavzu bo‘yicha 5 daqiqa davomida yapon tilida nutq o‘qishadi, shundan so‘ng nutq mazmuni yuzasidan berilgan ikki savolga javob berishlari kerak bo‘ladi. Tanlov g‘oliblari tashkilotchilar tomonidan qimmatbaho sovrinlar bilan mukofotlanadi.
Izoh (0)