O‘zbekistonning kon-metallurgiya sohasi korxonalari 2015—2025-yillarda oltin qazib olishni ko‘paytirishga 1,1 milliard dollardan ortiq investitsiya kiritishga tayyor, deya xabar bermoqda “Gazeta.uz”.

Oltin qazib olishni ko‘paytirish bo‘yicha loyihalar 2015—2019-yillarda ishlab chiqarishni tarkibiy o‘zgartirish, modernizatsiya va diversifikatsiya qilishni ta’minlash bo‘yicha chora-tadbirlar dasturiga kiritildi. Ular sohadagi ikkita korxona — Navoiy va Olmaliq kon-metallurgiya kombinatlarida amalga oshiriladi.

NKMK besh yil davomida umumiy qiymati 330 million dollarga teng to‘rtta yangi oltin qazib oluvchi konni qurishni, shuningdek amaldagi Muruntov va Zarmitan ochiq konlarini 485 million dollarga modernizatsiya qilishni rejalashtirmoqda.

OKMK esa 2025-yilgacha Qizilolma koni bazasidagi 185 million dollarlik ikkita yer osti konlari qurilishini yakunlashi kerak.

Loyihalar korxonalarning o‘z mablag‘lari, o‘zbek banklari hamda O‘zbekiston Tiklanish va taraqqiyot jamg‘armasi kreditlari hisobidan moliyalashtiriladi.