National Geographic Traveler jurnali hordiq chiqarish uchun sobiq SSSR hududidagi eng yaxshi sayohat yo‘nalishlarni tanladi. 12news.uz’ning xabar berishicha, bu haqda jurnalning 2015-yil aprel-may sonlarida ma’lumot berilgan.
National Geographic Traveler jurnali muharrirlari tanloviga ko‘ra, sobiq SSSRdagi sayohat qilish uchun eng yaxshi joylar ro‘yxatidan Samarqand, Issiqko‘l, Sankt-Peterburg va Viborg, Qrimning janubiy qirg‘oqlari, Kavkaz tog‘lari, Pomir, Mineralniye Vodi va Pyatigorsk buloqlari, Qutborti, Kavkazorti, Kamchatka, Oltoy va Tuva kabi hududlar bor.
National Geographic Traveler O‘zbekiston haqida shunday deb yozadi: “O‘rta Osiyodagi har bir sayohat yo‘nalishi odatda Samarqand orqali o‘tadi. Bu yerda pishiq uylar orasida YUNЕSKOning Jahon merosi ro‘yxatiga kiritilgan ulug‘vor Ulug‘bek, Sherdor va Tillaqori madrasalari qad rostlab turadi”.
Jurnal muharrirlarining fikricha, “Buyuk Ipak yo‘lida joylashgan, hashamatli karvonsaroylar, koshinlar bilan bezatilgan maqbara majmualari va masjidlari bor” Buxoroga ham borsa arziydi.
Ma’lumot uchun, rus tilida 110 ming tirajda chop etiladigan National Geographic Traveler jurnali Rossiya va MDHning barcha mamlakatlarida tarqatiladi. Travel.ru sayti esa oyiga 2 million tashrifchi kiradigan ommabop sayohat saytlaridan biridir.
Izoh (0)