Toshkentda “Samarqandning oltin yog‘dulari” ko‘rgazmasi ochildi

O‘zbekiston Davlat san’at muzeyida “Samarqandning oltin yog‘dulari” ko‘rgazmasi ochildi, deb xabar beradi Uzbekistan Today.

Ko‘rgazmada O‘zbekiston Badiiy akademiyasi rassomlar ijodiy uyushmasi a’zosi Xurshid Halilovning portret, peyzaj, natyurmort, Samarqandning me’moriy yodgorliklari va tabiati tasvirlangan suratlari namoyish qilinmoqda.

Bu rassomning ishlari AQSh, Fransiya, Germaniya, Yaponiya, Rossiya, Qozog‘iston va boshqa davlatlardagi ko‘plab muzeylar va shaxsiy kolleksiyalarda saqlanadi.

Rassomchilikdan tashqari u bino va inshootlarni bezatish ishlari bilan ham shug‘ullanadi.

– Xurshid Halilov doimo o‘z ustida ishlaydi, tez-tez manzaralarni, misol uchun, Qashqadaryo viloyatidagi G‘ilon qishlog‘i suratini chizish uchun tabiatga chiqib turadi. U bundan keyin ham shunday ishlashda davom etsa, ko‘p narsaga erishadi, deb o‘ylayman, —  dedi O‘zbekiston Badiiy akademiyasi a’zosi, samarqandlik taniqli kulol Xudoyberdi Xaqberdiyev.

Ko‘rgazmaning ochilishida O‘zbekiston Badiiy akademiyasining Samarqand bo‘limi a’zolari, Samarqand muzeylarining xodimlari, kollej va oliy o‘quv yurtlari talabalari ishtirok etdi.