AQShning Baltimor shahridagi tartibsizliklarni bartaraf etish uchun Milliy gvardiya jalb qilindi

AQShning Merilend shtatidagi Baltimor shahri ko‘chalarida AQSh Milliy gvardiyasining ilk bo‘linmalari paydo bo‘ldi, deb xabar qiladi Fox News.

Maxsus bo‘linma jangchilari tartibsizliklar avj olgan shaharga 28-aprel, seshanba kuni yarim tundan so‘ng yetib keldi.

27-aprel kuni tunda mer Stefani Rolings-Bleyk komendantlik soatini joriy qildi va aholiga tungi o‘ndan tonggi beshgacha ko‘chaga chiqishni taqiqladi.

Eslatib o‘tamiz, q o‘lga olingan qora tanli erkakning o‘limidan keyin kelib chiqqan norozilik tufayli politsiya va mahalliy aholi o‘rtasida yana to‘qnashuvlar boshlanganidan so‘ng Merilend gubernatori Lari Xogan 27-aprel kuni favqulodda holatni joriy qilgandi. Shu kechaning o‘zidayoq shtat hukumati Baltimordagi tartibsizliklar bilan kurashish uchun yordam kuchi chaqirishga qaror qildi.

Politsiya vakili Uilyam Palotssining so‘zlariga ko‘ra, shtatning 500 nafar politsiyachisi yordam uchun Baltimorga yuborilgan.

Milliy gvardiya vakili esa o‘z navbatida bo‘linma jangchilari shaharda tartib o‘rnatayotganda, “o‘zlarini va odamlarni himoya qilish uchun” qurollanishlarini jurnalistlarga ma’lum qildi.

Hukumat 25 yoshli afroamerikalik Freddi Greyning o‘limi yuzasidan tergov ishlari olib borishga va’da berdi.