Qozog‘istonning Sariag‘ash shahrida yosh ayol o‘zining ikki nafar qizini bo‘yinbog‘ yordamida sovuqqonlik bilan bo‘g‘ib o‘ldirdi, deb xabar qiladi “Newskaz.ru”.
“Shafqatsiz qotillik Janubiy Qozog‘istonning Sariag‘ash aholisini oyoqqa turg‘azdi. Yosh ayol sovuqqonlik bilan o‘zining yosh qizlarini nobud qildi. Ulardan biri 9, ikkinchisi 11 yoshda edi. Qotil onani qo‘lga olishdi, uning yana bir o‘g‘li bor”, — deyiladi “KTK” telekanalining e’lonida.
OAVlar xabariga ko‘ra, bolalarning otasi yetti yil oldin olamdan o‘tgan. O‘shandan buyon yolg‘iz ona qandolatchilik orqasidan zo‘rg‘a kun ko‘rgan.
“Qo‘shnilarning so‘zlariga ko‘ra, oilaning qarzlari bo‘lgan. Kechqurun ayol politsiyachilarga qay tariqa qizlarini o‘ldirganini so‘zlab berayotganida, qo‘shnilar uning bunday hayotdan to‘ygani haqida aytgan gaplarini eshitgan. 33 yoshli Feruza haqida qo‘shnilar ko‘p gap aytmadi. Faqatgina u hech kim bilan do‘stlashmasligi, shu bilan birga janjallashmasligini ham ta’kidladi. U qattiqqo‘l ona bo‘lgan ekan”, — deyiladi telekanal xabarida.
Taxminlarga ko‘ra, ona o‘z qizlarini bo‘yinbog‘ bilan bo‘g‘gan. Politsiya boshqa tafsilotlarni oshkor qilmayapti. Faqatgina ayolning qo‘lga olingani ma’lum. To‘ng‘ich qizidan tashqari ayolning to‘qqizinchi sinfda o‘qiydigan o‘g‘li ham bor. U uyda bo‘lgan hodisalarni birinchi bo‘lib ko‘rgan. O‘smir hozirda qarindoshlari bilan yashamoqda. U bilan ruhshunoslar ish olib bormoqda.
Izoh (0)