Putinga uning armanlar genotsidi haqidagi gaplariga Erdo‘g‘on aytgan javobni yetkazishdi

Vladimir Putin Turkiya prezidenti Rajab Toyyib Erdo‘g‘on Rossiya yetakchisining armanlar genotsidi haqida aytgan gaplariga qanday munosabat bildirganidan xabar topdi, deb yozadi “Nur.kz” davlat rahbari matbuot kotibi Dmitriy Peskovga tayanib.

Jurnalistlar Erdo‘g‘onning so‘zlari Rossiya-Turkiya munosabatlariga ta’sir qilishi va “Turkiya oqimi” loyihasiga salbiy ta’sir o‘tkazishi mumkinligi haqida qiziqdi.

“Yo‘q, biz avval ham ko‘pqirrali hamkorligimiz rivojlansa, o‘zimizga ham foyda ekanligini ko‘p bora aytganmiz. Bu holatda aloqalarimiz shu vaqtgacha rivojlanib kelgani kabi oldinga siljishda davom etishiga umid qilib qolamiz”, — deya javob berdi Peskov.

27-aprel kuni Rajab Toyyib Erdo‘g‘on Rossiya 1915-yildagi voqealarni genotsid deb atash o‘rniga, Ukraina va Qrimdagi xatti-harakatlari uchun javob berishi kerakligini aytgan edi.

“Rossiya bu borada ‘genotsid’ so‘zini birinchi marta ishlatayotgani yo‘q. Putinning bunday qadamni qo‘ygani shaxsan meni qayg‘uga soldi. Hozir Ukraina va Qrimda nimalar bo‘layotgani aniq-ravshan ko‘rinib turibdi. Ular avval buni tushuntirib berishi, so‘ng ‘genotsid’ so‘zini ishlatishi kerak edi”, — dedi davlat rahbari Anqaradagi matbuot anjumanida.