Saudiya Arabistonining Jidda aeroportida eronlik ziyoratchilarga jinsiy shilqimlik qilganlikda aybdor deb topilgan shaxslar eng oliy – o‘lim jazosiga hukm qilinadi. Bu haqda “TASS” xabar bermoqda.
“Jidda xalqaro aeroportida ikki eronlik o‘smir ziyoratchiga shilqimlik qilingani yuzasidan Saudiya Arabistonining vakolatli organlari tergov olib bormoqda, prokuratura tegishli harakatlarni yakunlamoqda”, - deya ISNA, Saudiya Arabistoni Tashqi ishlar vazirligi Jiddadagi Eron konsulligiga yo‘llagan maktubdan iqtibos keltirmoqda.
“Saudiya Arabistoni sud tizimi islom huquqi, shariat normalariga asoslanadi va bunday jinoyatlarda aybdor deb topilgan shaxslarga eng oliy jazo belgilanadi”, - deyiladi TIV maktubida. Aybdorlarga nisbatan hukm o‘qilgani haqida konsullikka axborot berilishi qayd etib o‘tilgan.
28-mart kuni Jidda aeroportida xavfsizlik xizmati xodimlari Saudiya Arabistonidan qaytib ketayotgan 14 va 15 yoshdagi eronlik o‘smir ziyoratchilarni jinsiy zo‘rlashgan. Bu holat Eronda jiddiy e’tirozga sabab bo‘lib, hatto norozilik namoyishlari ham bo‘lib o‘tgan.
Norozilik namoyishlarining ishtirokchilari Tehrondagi Saudiya Arabistoni elchixonasi va Mashhaddagi konsulligini yopishni, shuningdek, eronliklarning Saudiya Arabistonidagi muqaddas ziyoratgohlarga borishlarini taqiqlashni talab qilib chiqishdi.
Shundan so‘ng, ko‘p o‘tmay, rasmiy Tehron ushbu holat bo‘yicha tergov-surishtiruv ishlari yakunlanmaguniga qadar, Saudiya Arabistoniga ziyoratchilarni olib boradigan o‘z laynerlari parvozlarini to‘xtatib qo‘ydi.
Izoh (0)