AQShda o‘limga olib keluvchi infeksiya tarqaldi

AQShda karamelli olmalar tarkibida bo‘lgan listeriozni yuqtirib, besh kishi halok bo‘ldi, deya xabar bermoqda “Rossiyskaya gazeta”.

Xavfli infeksiyani 28 kishi yuqtirib olgan, ularning 26 nafari kasalxonaga yotqizilgan, 5 nafarini shifokorlar qutqarib qola olmagan. Kasallanish hodisalari 10 ta shtatda qayd etilgan.

AQSh epidemiologik nazorat tizimida vakolatlar idoralar o‘rtasida bo‘lib tashlangani tufayli infeksiya manbasi tezkorlik bilan aniqlanmadi. Infeksiya o‘chog‘i chegaralari noto‘g‘ri belgilangani sababli epidemik jarayon qo‘shni shtatlarga ham tarqalib ketdi.

Listerioz — yangi tug‘ilgan chaqaloqlarda o‘lim darajasining yuqoriligi bilan tavsiflanuvchi Listeria turidagi patogen bakteriyalar keltirib chiqaradigan infeksion kasallik. Listeriozni qo‘zg‘atuvchi kislorod kirishini cheklab qo‘yadigan plyonkaga o‘ralgan oziq-ovqat mahsulotlarida uzoq vaqt saqlanishi mumkin.