Yoshlar ijod saroyida Respublika ixtisoslashtirilgan san’at maktab-internatining 85 yilligiga bag‘ishlangan “San’at beshigi 85 yoshda” nomli ko‘rgazma va yubiley tantanasi bo‘lib o‘tdi. Bu haqda O‘zbekiston Badiiy akademiyasi rasmiy sayti xabar bermoqda.
Mazkur tadbirda turli vazirlik va idoralar, ijodiy tashkilotlar vakillari, taniqli madaniyat arboblari, akademik rassomlar, Respublika ixtisoslashtirilgan san’at maktabi ma’muriyati, o‘qituvchi-murabbiylar, o‘quvchilar, ota-onalar, san’at namoyandalari va ixlosmandlari, shahar ahli, yurtimiz mehmonlari hamda ommaviy axborot vositalari xodimlari ishtirok etdi.
“San’at beshigi 85 yoshda” ko‘rgazmasida rassomlik bo‘limining ijodiy faoliyati va badiiy merosi namoyish etildi.
Respublika ixtisoslashtirilgan san’at maktab-internati 1929-yilda 20-sonli bolalar uyi negizida tashkil topdi va 1950-yillarda iqtidorli bolalar uyiga aylantirildi. 1964-yildan birinchi bor maktabda rassomlik bo‘limi ochilib, unga Respublika o‘rta maxsus musiqa-rassomlik maktab-internati maqomi berildi. 1985-yilda maktab-internat O‘zbekiston Respublikasi Madaniyat va sport ishlari vazirligi tasarrufiga o‘tkazilib, Respublika san’at maktab-internatiga aylantirildi. 1997-yil O‘zbekiston Badiiy akademiyasi o‘z faoliyatini boshlagandan so‘ng, maktab-internatga Respublika tasviriy va amaliy san’at maktab-internati nomi berilib, O‘zBA tasarrufiga o‘tkazildi.
Izoh (0)