OFK 22 yoshgacha bo‘lgan yoshlar o‘rtasida yangi musobaqani tashkil qildi va uning dastlabkisi Ummon davlatida o‘tkazildi. Ushbu yosh toifasida navbatdagi musobaqa esa olimpiada yo‘llanmalari uchun saralash vazifasini bajaradi. Bu haqda Stadion.uz xabar berdi.
Tojikiston futbol federatsiyasi rasmiy saytining xabar berishicha, U22 qit’a chempionatining saralash bosqichida ishtirok etish uchun 44 ta terma jamoa ariza topshirgan. Saralash bosqichiga qur’a tashlash marosimi dekabr oyida bo‘lib o‘tadi.
G‘arb mintaqasida 24 ta jamoa ishtirok etadi: Afg‘oniston, Bahrayn, Bangladesh, Hindiston, Eron, Iroq, Iordaniya, Quvayt, Qirg‘iziston, Livan, Maldiv orollari, Nepal, Ummon, Pokistan, Falastin, Qatar, Saudiya Arabistoni, Shri-Lanka, Suriya, Tojikiston, Turkmaniston, BAA, O‘zbekiston va Yaman. Bu mintaqa vakillari 5 ta guruhga bo‘linadi (3 ta guruhda 5 tadan, 2 ta guruhda 4 tadan jamoa).
Sharq mintaqasida esa saralashda 20 ta jamoa qatnashadi: Avstraliya, Bruney, Kamboja, Xitoy, Xitoy Taypeyi, KXDR, Gonkong, Indoneziya, Yaponiya, Janubiy Koreya, Laos, Makao, Malayziya, Mo‘g‘uliston, Myanma, Filippin, Singapur, Tailand, Sharqiy Timor va Vyetnam. 20 ta jamoa 5 tadan 4 ta guruhga bo‘linadi.
Demak, 9 ta saralash guruhlari g‘oliblari va 2-o‘rinni egallaganlar orasida eng yaxshi ko‘rsatkichga ega bo‘lgan 6 ta jamoa final bosqichi yo‘llanmasini qo‘lga kiritadi.
Hozircha saralash bosqichiga mezbonlik qilish istagini 7 ta davlat bildirgan. Ular: Bangladesh, Eron, Pokiston, Falastin, Qatar (G‘arb mintaqasi), Xitoy Taypeyi va Indoneziya (Sharq mintaqasi). Saralash bosqichini o‘zida o‘tkazishni istagan federatsiyalar 10 oktabrga qadar ariza topshirishlari mumkin. Qaysidir guruhda mezbonlikni qo‘lga kiritishni istagan jamoa bo‘lmasa, OFK saralash o‘yinlarini neytral maydonda o‘tkazadi. Saralash bahslari 2015-yilning 23—31-mart kunlari oralig‘ida tashkil qilinadi.
Osiyo chempionatining final bosqichi esa 2016-yilda o‘tkazaladi. OFK taqvim-rejasiga ko‘ra, turnir yanvar oyida o‘tkazilishi kerak. Final bosqichiga mezbonlik qilish uchun 4 ta davlat ariza topshirgan. Ular orasida O‘zbekiston ham bor. Bu yo‘lda mamlakatimizga Eron, Qatar va Saudiya Arabistoni mamlakatlari raqiblik qilishadi. Mezbon jamoa nomi 28-noyabr kuni OFKning Ijroqo‘mida aniqlanadi. Ungacha esa OFK komissiyasi vakillari ariza bergan mamlakatlarda tekshiruv ishlarini o‘tkazib qaytishadi.
OFKdan olingan ma’lumotlarga ko‘ra, U22 yoshlar o‘rtasidagi Osiyo chempionati mezbonligini O‘zbekiston qo‘lga kiritadigan bo‘lsa, musobaqa yanvarda emas, mart oyida bo‘lib o‘tadi. OFK va O‘FF o‘rtasida shunday kelishuv o‘rnatilgan.
Mezbon jamoa esa saralash bosqichidan ozod etiladi. Osiyo chemponati sovrindorlari (3 ta jamoa) Rio-de-Janeyroda o‘tkaziladigan olimpiya o‘yinlari yo‘llanmasini qo‘lga kiritadi.
Izoh (0)