KXDR yetakchisi Kim Chen Inning shaxsiy pul mablag‘larini boshqaruvchi yuqori mansabli shimoliy koreyalik moliyachi Yun De Xyon chet elga qochib ketdi va ayni paytda, taxminlarga ko‘ra, Rossiya hududida yuribdi. Bu haqda “ITAR-TASS” xabar berdi.
Janubiy Koreyaning “Chunan ilbo” gazetasi yozishicha, Yun De Xyon uchinchi mamlakat (chet ellik yoki fuqaroligi bo‘lmagan shaxslarning kelib chiqish joyi bo‘lmagan mamlakat)dan boshpana qidirmoqda.
“Shimoliy Koreyadagi Joson Daesong Bank banki rahbari Yun De Xyon Rossiyaning Naxodka portida yo‘qolib qoldi. U o‘zi bilan ‘inqilobiy fondlar’ga tegishli 5 millionga yaqin mablag‘ni olib ketgan. Uning boshpana so‘rab murojaat qilgani taxmin etilmoqda”, — deb yozadi nashr.
“Chunan ilbo” ta’kidlashicha, Yun De Xyon KXDR yetakchisining moliyaviy operatsiyalari haqida katta hajmdagi ma’lumotga ega. Uning asosiy vazifasi Kim Chen In va uning marhum otasi Kim Chen Irning xorijdagi maxfiy fondlarini boshqarishdan iborat bo‘lgan.
2010-yil noyabrda AQSh ushbu bankni KXDRdagi “noqonuniy moliyaviy loyihalarga aloqadorlik”da ayblab, “qora ro‘yxat”ga kiritgan edi.
Izoh (0)