Rossiya tomonidan BMT Xavfsizlik Kengashiga kiritilgan, Ukraina sharqida o‘t ochishni to‘xtatish haqidagi bayonot loyihasi bloklab qo‘yildi. Bu haqda Rossiya Federatsiyasining BMTdagi doimiy vakili Vitaliy Churkinga tayanib, “ITAR-TASS” xabar berdi.
“Rossiya delegatsiyasi tomonidan taklif qilingan bayonot jiddiy bo‘lmagan sabab ostida bloklab qo‘yildi”, — dedi diplomat. Uning so‘zlariga ko‘ra, “bir qator a’zolarining vayronkor urinishlari natijasida, Xavfsizlik Kengashi Ukrainadagi tanglikni hal qilishda o‘z rolini bajara olmadi”.
BMT Xavfsizlik Kengashi uchrashuvi chog‘ida Litva doimiy vakili Raymonda Murmokayte Rossiya tomonidan tayyorlangan hujjat loyihasida “ba’zi muhim masalalar aks etmagan”ini, jumladan, “ayirmachilar Ukraina hukumati tomonidan gumanitar yordam berilishiga to‘sqinlik qilayotgani” keltirilmaganligini aytdi.
Rossiyaning ariza loyihasida Donbassda yomonlashib borayotgan vaziyat yuzasidan jiddiy xavotir bildirilgan. U “o‘t ochishni darhol va to‘la to‘xtatish”ga, shuningdek 2014-yil 17-apreldagi Jeneva bayonoti va 2014-yil 2-iyuldagi Berlin deklaratsiyasi asosida muzokaralar boshlashga chaqiradi. Hujjatda shuningdek, “Ukrainaning Donetsk va Lugansk viloyatlari aholisiga gumanitar yordam taqdim etish bo‘yicha kuchlarni ko‘paytirish” zaruriyati ko‘rsatiladi.
Biroq hujjatda Donbassdagi vaziyatni hal etish bo‘yicha amaliy choralar keltirilmagan.
Izoh (0)