КХДР етакчиси Ким Чен Иннинг шахсий пул маблағларини бошқарувчи юқори мансабли шимолий кореялик молиячи Юн Дэ Хён чет элга қочиб кетди ва айни пайтда, тахминларга кўра, Россия ҳудудида юрибди. Бу ҳақда ИТАР-ТАСС хабар берди.
Жанубий Кореянинг «Чунан ильбо» газетаси ёзишича, Юн Дэ Хён учинчи мамлакат (чет эллик ёки фуқаролиги бўлмаган шахсларнинг келиб чиқиш жойи бўлмаган мамлакат)дан бошпана қидирмоқда.
«Шимолий Кореядаги Joson Daesong Bank банки раҳбари Юн Дэ Хён Россиянинг Находка портида йўқолиб қолди. У ўзи билан ‘инқилобий фондлар’га тегишли 5 миллионга яқин маблағни олиб кетган. Унинг бошпана сўраб мурожаат қилгани тахмин этилмоқда», — деб ёзади нашр.
«Чунан ильбо» таъкидлашича, Юн Дэ Хён КХДР етакчисининг молиявий операциялари ҳақида катта ҳажмдаги маълумотга эга. Унинг асосий вазифаси Ким Чен Ин ва унинг марҳум отаси Ким Чен Ирнинг хориждаги махфий фондларини бошқаришдан иборат бўлган.
2010 йил ноябрда АҚШ ушбу банкни КХДРдаги «ноқонуний молиявий лойиҳаларга алоқадорлик»да айблаб, «қора рўйхат»га киритган эди.
Изоҳ (0)