Shavkat Mirziyoyevning sud faoliyatini raqamlashtirishni yanada kengaytirish va samaradorligini oshirish borasidagi tashabbusi bugungi texnologiyalar davrida muhim ahamiyatga ega.
Qayd etilishicha, inson manfaatlari, qonun ustuvorligini ta’minlaydigan bu sohani takomillashtirish davlatimizning doimiy e’tiborida. So‘nggi sakkiz yilda sudlarga doir 70 ga yaqin qonun, farmon va qaror qabul qilindi. Ularning moddiy-texnik bazasi yaxshilandi.
Bular aholi va tadbirkorlarning masalalarini hal etib, adolatni qaror toptirishga xizmat qilyapti. O‘tgan yili sudlarda 3 milliondan ortiq masala ko‘rib chiqildi. Hozirgi kunda sudga ariza berish, sud ishining holatini kuzatish, sud hujjatlaridan elektron nusxa olish kabi 14 ta xizmat raqamlashgan. Oliy sudning my.sud.uz portalida xizmatlar va undan foydalanuvchilar soni ko‘payib bormoqda. Shu paytgacha 17 millionga yaqin sud ishi axborot tizimlari orqali yuritilgan, 15,5 millionta ish sudyalarga inson omilisiz taqsimlangan.
Sud tizimini raqamlashtirish orqali ishlarning tezligi va samaradorligi oshadi. Bu jarayon sudlarga ariza berish, ish holatini kuzatish, hujjatlarni elektron shaklda olish kabi xizmatlarni ko‘rsatishning sifatini yaxshilaydi.
Shu bilan birga, masofaviy huquqiy yordam, jarimalarni onlayn kuzatish va to‘lash imkoniyatlari fuqarolar uchun katta qulaylik yaratadi, davlat va xalq o‘rtasida ishonchni mustahkamlashga olib keladi.
Masalan, shu kungacha 2,7 millionta murojaat elektron shaklda kelib tushgan. Sud prosessi ishtirokchilariga esa sudga oid 1,1 millionta sms xabar yuborilgan.
Bu tashabbusning yana bir ijobiy tomoni shundaki, sud tizimining raqamlashtirilishi barcha aloqador tashkilotlar va fuqarolar bilan samarali ma’lumot almashishni ta’minlaydi.
Shuningdek, tadbirkorlik, investisiya, infratuzilma kabi sohalarda qonunlar va tartibotlar osonlashtiriladi, bu esa iqtisodiyotni rivojlantirishga va aholi turmush darajasini yaxshilashga yordam beradi. Davlatimiz rahbarining ushbu tashabbusi, albatta, jamiyatimiz uchun yangi imkoniyatlar ochadi.
Izoh (0)