Jurnalist Ruxsora G‘afurova o‘zgalar nomiga kredit olib, uni o‘zlashtirganlikda gumon qilinayotgan sobiq bank xodimi haqida material tayyorlagan va uni efirga uzatgani ortidan mahkamaga tortilgan edi. Sud bugun, 27-fevral kuni ishni surishtiruv organiga qo‘shimcha o‘rganish va kamchiliklarni bartaraf etish uchun qaytardi. Bu haqda “Daryo” muxbiri xabar bermoqda.
-RAMdTQZF.jpg)
Nima bo‘lgan edi?
Jurnalist o‘zgalar nomiga isteʼmol krediti olib, uni o‘zlashtirganlikda gumon qilinayotgan sobiq bank xodimi haqida material tayyorlagan va uni efirga uzatgan. Surishtiruv keng muhokamalarga sabab bo‘lgan va holat yuzasidan jinoyat ishi qo‘zg‘atilgan.
O‘zgalar nomiga kredit olganlikda gumon qilinayotgan bank xodimi haqidagi surishtiruvi ortidan jurnalist Ruxsora G‘ofurovaga nisbatan maʼmuriy ish qo‘zg‘atilgan. Jurnalistga Maʼmuriy javobgarlik to‘g‘risidagi kodeksning 46−2-moddasi (shaxsga doir maʼlumotlar to‘g‘risidagi qonunchilikni buzish) bilan maʼmuriy huquqbuzarlik to‘g‘risidagi ish qo‘zg‘atilgan va to‘plangan hujjatlar jinoyat ishlari bo‘yicha Mirzo Ulug‘bek tumani sudiga oshirilgan edi.
Ish muddati o‘tgan
Ruxsora G‘afurovani himoya qilayotgan advokat Amrullo Ahmedovning aytishicha, 2025-yil 25-yanvar kuni Mirzo Ulug‘bek tumani IIBga himoyasidagi shaxs bilan borgan va o‘sha kuni qo‘zg‘atilgan maʼmuriy ish tugallangani maʼlum qilingan.
Lekin menga, yaʼni advokatga garchi huquqim bo‘lsa ham, ish bilan tanishishga imkon berishmadi. IIB maʼmuriy ishni tamomlab, sudga yuborishi kerak edi. Lekin nomaʼlum sabablarga ko‘ra bu ish 27-fevralgacha cho‘zilib keldi.
Qonunchilikka ko‘ra, jinoyat ishini qo‘zg‘atish rad etilgan yoki jinoyat ishi tugatilgan bo‘lsa-yu, lekin huquqbuzarning harakatlarida maʼmuriy huquqbuzarlik alomatlari mavjud bo‘lsa, qaror qabul qilingan kundan eʼtiboran bir oydan kechiktirmay qo‘llanishi lozim. Shundan kelib chiqib, Ruxsora G‘afurova aybli, deb topilgan taqdirda ham uni ko‘rish muddati o‘tib ketgan, dedi Amrillo Ahmedov.
Maʼmuriy javobgarlikka asos yo‘q
Jurnalistning yana bir advokati Davronbek Ahmadovning aytishicha, Ruxsora G‘afurovaning xatti-harakatlarida maʼmuriy javobgarlik tarkibi mavjud emas.
Jurnalistning vazifasi — jurnalistik surishtiruv natijasida tayyor bo‘lgan mahsulotni jamoatchilikka yetkazish. Agar jurnalist mahsulotini ommaga yetkazmaydigan bo‘lsa, maʼmuriy yoki jinoiy huquqbuzarlik, siyosiy-ijtimoiy holat haqida xabardor qilmaydigan bo‘lsa, jurnalistik surishtiruvning mazmun va mohiyati yo‘qoladi.
Agar jurnalist surishtiruv natijasi bo‘yicha jinoyat haqida xabar berilsa va bu xabar orqali boshqa shaxslarning huquq va manfaatlari himoya qilinadigan bo‘lsa, bu holatda jinoyat sodir qilgan shaxs yoki huquqbuzarlik qilgan shaxs ism-sharifini identifikatsiya qilish maʼmuriy javobgarlik tarkibini bermaydi. Chunki u jinoyat haqida yoki boshqa ijtimoiy-siyosiy holat haqida xabar bermoqda. Yaʼni shaxsning ism va familiyasi ochiqlanishi shaxsga doir maʼlumotni buzish hisoblanmaydi.
Bu holatda ichki ishlar organlari shoshma-shosharlik bilan, bir taraflama yoki boshqa subyektiv sabablarga ko‘ra ishni sudga olib chiqqan. Ko‘rinib turibdiki, shoshma-shosharlik bilan qaror qabul qilingani uchun ham bugun sud ishni surishtiruvga, qo‘shimcha o‘rganishga qaytardi, dedi advokat.
Uning qo‘shimcha qilishicha, agar ichki ishlar organlari sud tomonidan ko‘rsatilgan kamchiliklarni bartaraf etsa, ish yana qayta sudga olib chiqiladi. Aksincha, ko‘rsatilgan kamchiliklar bartaraf etilmasa, ish tugallanishi ham mumkin.
Advokatlarning aytishicha, arizachi taraf (sobiq bank xodimi) sudga Ruxsora G‘afurovaga nisbatan daʼvosi yo‘qligi haqida xat bergan. “Daryo” muxbiri mazkur xat masalasida izoh olish uchun sud binosida ikkinchi tarafni yoki uning biror vakilini topolmadi. Agar shunday bo‘lsa, ish Maʼmuriy javobgarlik to‘g‘risidagi kodeksning “yarashilganligi munosabati bilan maʼmuriy javobgarlikdan ozod qilish” moddasi bilan tugallanishi mumkin.
Maʼlumot uchun, sud ishiga O‘zbekiston jurnalistlar uyushmasining vakili va uning huquqshunosi jamoat himoyachisi sifatida hozir bo‘ldi.
Oliy sud jamoatchilik bilan aloqalar markazi rahbari Aziz Obidovning maʼlum qilishicha, ishni ko‘rib chiqishga tayyorlash vaqtida ish hujjatlari Maʼmuriy javobgarlik to‘g‘risidagi kodeksning 303-303-1-moddalari talablari buzilgan holda sudga yuborilgani aniqlangan. Shu sababli ushbu ish materiali qayta rasmiylashtirish uchun Mirzo Ulug‘bek tumani IIO FMBga qaytarilgan.
Izoh (0)