Sobiq deputat, ijtimoiy tarmoq faoli Qobil Dusov 11 oyga ozodlikdan mahrum qilingani haqida xabar berilgan edi. Oliy sud mazkur holat yuzasidan ochiq sud jarayoni yakunlanganini ma’lum qildi.
Keltirilishicha, bugun jinoyat ishlari bo‘yicha Arnasoy tuman sudida K.Dusovga (1984-yilda Samarqand viloyatida tug‘ilgan) oid jinoyat ishini ko‘rib chiqish bo‘yicha ochiq sud jarayoni yakunlanib, sud hukmi e’lon qilindi. Ushbu jinoyat ishi jinoyat ishlari bo‘yicha Arnasoy tuman sudining raisi Sh. Eshimov raisligida birinchi instansiyada ko‘rib chiqildi.
Sud sudlanuvchining jinoyat sodir etishdagi aybi jabrlanuvchilar va guvohlarning ko‘rsatmalari, sudga oid lingvistik ekspertiza xulosasi, yozuvlar skrinshoti hamda jinoyat ishi bo‘yicha barcha to‘plangan, tekshirilgan, ishga aloqadorligi, maqbulligi va ishonchliligi nuqtayi nazaridan baholangan dalillar bilan to‘liq isbotlangan deb hisobladi.
Sud hukmiga muvofiq K.Dusov Jinoyat kodeksning 139-moddasi 3-qismi “a”, “g” bandlari va 140-moddasi 3-qismi “a” bandi bilan fuqaro M.Eshimqulovga, Jinoyat kodeksining 139-moddasi 3-qismi “a”, “g” bandlari bilan fuqarolar O.Kamolova va Sh.Hasanovaga oid ayblov epizodlari bo‘yicha ifodalangan jinoiy hodisa yuz bermagani sababli aybsiz deb topilib, Jinoyat protsessual kodeksining 83-moddasi 1-bandiga asosan oqlandi.
K.Dusov 4 nafar jabrlanuvchiga (Jizzax viloyati maktabgacha va maktab ta’limi boshqarmasi tizimi mas’ullari N.Yalgasheva, O.Kamolova, Sh.Hasanova va S.Suyarova) Jinoyat kodeksining 139-moddasi 3-qismi “a” bandi va 140-moddasi 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi, 59-moddasi 8-qismi va 61-moddasi tartibida uzil-kesil o‘tash uchun 1 yil 2 oy muddatga ozodlikdan mahrum qilish jazosi tayinlandi. Tayinlangan jazoni manzil-koloniyalarda o‘tash belgilandi.
Mazkur jinoyat ishi bo‘yicha manfaatdor taraflarga yetkazilgan moddiy va ma’naviy zararlarni undirish yuzasidan fuqarolik sud ishlarini yuritish tartibida sudga murojaat qilish huquqlari mavjudligi tushuntirildi.
Birinchi instansiya sudining hukmi ustidan taraflar qonunda belgilangan tartib va muddatda Jizzax viloyat sudining jinoyat ishlari bo‘yicha sudlov hay’atiga apellyatsiya/kassatsiya tartibida shikoyat berish va protest keltirishga haqliligi ma’lum qilindi.
Ma’lumot uchun:
Jinoyat ishlari bo‘yicha Chilonzor tuman sudining 2024-yil 22-noyabrdagi hukmiga muvofiq Qobil Dusov Jinoyat kodeksining 140-moddasi (haqorat qilish) 3-qismi “a” bandida nazarda tutilgan jinoyatni sodir etganlikda aybli deb topilib, unga 1 yil muddatga ozodlikni cheklash jazosi tayinlangandi.
Yashnobod tuman IIO FMB Probatsiya bo‘limi tomonidan sudga Qobil Dusovning o‘talmay qolgan 11 oy 2 kun ozodlikdan cheklash jazosini shu muddatga ozodlikdan mahrum qilish jazosiga almashtirishni so‘rab taqdimnoma kiritilgan. Taqdimnomaga ko‘ra, Dusov belgilangan cheklovlarga rioya qilmagan va jazo shartlarini qasddan buzgan.
Jinoyat kodeksining 48-1-moddasiga (ozodlikni cheklash) asosan Dusovga sutkaning muayyan vaqti, yaʼni kech soat 21:00 dan ertalabki soat 07:00 ga qadar yashash joyidan chiqish cheklanishi va unga qo‘shimcha internetdan foydalanmaslik, ommaviy va boshqa tadbirlar o‘tkazishda ishtirok etmaslik, har oyda bir marotaba yashash joyi bo‘yicha IIO FMB Probatsiya bo‘limidan ro‘yxatdan o‘tib turish hamda mahkumlarni nazorat qiluvchi organning roziligisiz yashash joyini o‘zgartirmaslik kabi taqiqlar yuklanishi belgilangandi.
Shunga qaramasdan, 2025-yil 4-yanvardan 11-yanvargacha u “Kobul Dusov/Rasmiy kanal” Telegram kanalida har xil mazmundagi materiallar joylashtirib kelgani aniqlangan. Ushbu holat yuzasidan Dusov 2025-yil 11-yanvar kuni Yashnobod tumani IIO FMB Probatsiya bo‘limiga chaqirtirilib, Jinoyat-ijroiya kodeksining 44-4-moddasi 1-qismi bilan ogohlantirish tarzidagi intizomiy jazo qo‘llangan.
Dusovga 24-yanvar kuni IIV TQD Kiberxavfsizlik tomonidan yana ogohlantirish intizomiy jazosi eʼlon qilingan bo‘lsa-da, undan oldin ham, undan keyin ham internetdan faol foydalanib kelgani aniqlangan. Sud taqdimnomani muhokama qilib, ish hujjatlarini tekshirib, taqdimnomani qanoatlantirishni lozim topdi.
Izoh (0)