Шавкат Мирзиёевнинг суд фаолиятини рақамлаштиришни янада кенгайтириш ва самарадорлигини ошириш борасидаги ташаббуси бугунги технологиялар даврида муҳим аҳамиятга эга.
Қайд этилишича, инсон манфаатлари, қонун устуворлигини таъминлайдиган бу соҳани такомиллаштириш давлатимизнинг доимий эътиборида. Сўнгги саккиз йилда судларга доир 70 га яқин қонун, фармон ва қарор қабул қилинди. Уларнинг моддий-техник базаси яхшиланди.
Булар аҳоли ва тадбиркорларнинг масалаларини ҳал этиб, адолатни қарор топтиришга хизмат қиляпти. Ўтган йили судларда 3 миллиондан ортиқ масала кўриб чиқилди. Ҳозирги кунда судга ариза бериш, суд ишининг ҳолатини кузатиш, суд ҳужжатларидан электрон нусха олиш каби 14 та хизмат рақамлашган. Олий суднинг my.sud.uz порталида хизматлар ва ундан фойдаланувчилар сони кўпайиб бормоқда. Шу пайтгача 17 миллионга яқин суд иши ахборот тизимлари орқали юритилган, 15,5 миллионта иш судьяларга инсон омилисиз тақсимланган.
Суд тизимини рақамлаштириш орқали ишларнинг тезлиги ва самарадорлиги ошади. Бу жараён судларга ариза бериш, иш ҳолатини кузатиш, ҳужжатларни электрон шаклда олиш каби хизматларни кўрсатишнинг сифатини яхшилайди.
Шу билан бирга, масофавий ҳуқуқий ёрдам, жарималарни онлайн кузатиш ва тўлаш имкониятлари фуқаролар учун катта қулайлик яратади, давлат ва халқ ўртасида ишончни мустаҳкамлашга олиб келади.
Масалан, шу кунгача 2,7 миллионта мурожаат электрон шаклда келиб тушган. Суд просесси иштирокчиларига эса судга оид 1,1 миллионта смс хабар юборилган.
Бу ташаббуснинг яна бир ижобий томони шундаки, суд тизимининг рақамлаштирилиши барча алоқадор ташкилотлар ва фуқаролар билан самарали маълумот алмашишни таъминлайди.
Шунингдек, тадбиркорлик, инвестисия, инфратузилма каби соҳаларда қонунлар ва тартиботлар осонлаштирилади, бу эса иқтисодиётни ривожлантиришга ва аҳоли турмуш даражасини яхшилашга ёрдам беради. Давлатимиз раҳбарининг ушбу ташаббуси, албатта, жамиятимиз учун янги имкониятлар очади.
Изоҳ (0)