Toshkent shahrida O‘zbekiston Investitsiyalar va tashqi savdo vazirligi tomonidan Yevropa Ittifoqining mamlakatdagi delegatsiyasi bilan birgalikda rivojlanish sohasida hamkorlik masalalari bo‘yicha O‘zbekiston—Yevropa Ittifoqi kichik qo‘mitasining tashkil etilgan 4-yig‘ilishi bo‘lib o‘tdi, deb xabar beradi “Dunyo” agentligi.
Investitsiyalar va tashqi savdo vazirligi ma’lumotiga ko‘ra, Yevropa komissiyasi delegatsiyasi hamda Yevropa Ittifoqiga a’zo davlatlarning O‘zbekistondagi elchixonalari, shuningdek, aloqador vazirlik va idoralar vakillari ishtirokida bo‘lib o‘tgan tadbirga investitsiyalar va tashqi savdo vazirining o‘rinbosari Shuhrat Vafoyev va Yevropa komissiyasi departamenti boshlig‘i Sara Rinaldi hamraislik qilgan.
Uchrashuv kun tartibidagi asosiy masalalar 2021–2027-yillarga mo‘ljallangan yangi dastur doirasida Yevropa komissiyasi bilan ikki tomonlama moliyaviy-texnikaviy hamkorlik istiqbollari va yo‘nalishlaridan iborat bo‘lgan.
Xususan, qishloq xo‘jaligini qo‘llab-quvvatlash va “yashil o‘sish”, sud hamda transport-logistika tizimlarining boshqaruv samaradorligini oshirish va raqamlashtirish, investitsiyaviy muhitni yuksaltirish, shuningdek, Orolbo‘yi mintaqasini ijtimoiy-iqtisodiy rivojlantirish yo‘nalishlarida loyiha va tadbirlarni amalga oshirish masalalariga to‘xtalib o‘tildi, deyiladi xabarda.
Yevropa tomoni Yevropa komissiyasining 2021–2024-yillarda O‘zbekistonga 83 million yevro miqdorida maqsadli grantlar ajratish, shuningdek, Orolbo‘yi mintaqasini rivojlantirish maqsadida Team Europe tashabbusi doirasida Yevropa Ittifoqiga a’zo davlatlar bilan birgalikda moliyaviy va texnik hamkorlikni kengaytirish niyatida ekanini ma’lum qilgan.
Muzokaralar yakunida Yevropa komissiyasining 2021–2027-yillarga mo‘ljallangan yangi dasturi doirasida qo‘shma tashabbuslarni jadallashtirish va muvaffaqiyatli amalga oshirish maqsadida yaqindan hamkorlik qilishga kelishilgan.
Avvalroq AQShdan Orolbo‘yi aholisi uchun gumanitar yordam yuborilgani, Janubiy Koreya Orolbo‘yi mintaqasi bo‘yicha trast fondining moliyaviy donoriga aylangani to‘g‘risida xabar berilgandi.
Izoh (0)