Toshkent viloyatining Yangiyo‘l tumanida joylashgan zavod ishchisi Xitoydan keltirilgan, aslida, mutaxassislar ishtirokida yig‘ilishi lozim bo‘lgan xarrakli yuk ko‘tarish mexanizmi (kozlovoy kran)ni montaj qilish jarayonida temirdan ishlangan og‘ir yuklarni ko‘tarish uchun mo‘ljallangan dastgoh (kranbalka)ning bir qismi boshiga tegishi oqibatida vafot etdi. Sud mazkur voqeada ishchilari xavfsizligini taʼminlamagan korxona rahbarini aybdor deb topdi va unga 2 yil muddatga ozodlikdan mahrum qilish jazosini tayinladi. Bu haqda sudda qatnashgan “Daryo” jurnalisti xabar berdi.
Marhumning yaqinlariga ko‘ra, voqea 2024-yilning 8-iyun kuni sodir bo‘lgan. Mazkur ish bo‘yicha sud 2025-yilning 26-fevral kuni hukm chiqardi.
Toshkent viloyatining Yangiyo‘l tumanida joylashgan “Kavsar Madad” xususiy korxonasida ish boshqaruvchi bo‘lib ishlab kelayotgan turmush o‘rtog‘im 2024-yil 8-iyun kuni ish joyida “kozlovoy kran”ning bir qismi boshiga tushib ketishi oqibatida vafot etgan. Bizga yetib kelgan dastlabki xabarda turmush o‘rtog‘im ish davomida balandlikka chiqib, xavfsizlikka rioya qilmagani sabab o‘zi yiqilib tushgani aytilgandi. Keyinchalik maʼraka tadbirlari o‘tgach, aslida, voqea boshqacha bo‘lgani, erimning boshiga temir kelib tushgani uchun vafot etganini bildirishdi. Ammo voqeani o‘rgangan tergovchi voqeani boshqacha talqin qilgan. U guvohlar ham erim tepadan yiqilib tushganini ko‘rishganini yozib, holatni baxtsiz tasodif sifatida baholagan va ishni yopgan. Men haqiqatni eshitganimdan so‘ng, tergovdan qoniqmaganimni aytib, qayta tergov qilishlarini talab qildim. Keyingi tergovda holat ochiqlandi. O‘sha voqeani o‘z ko‘zim bilan ko‘rdim, degan guvohlar ham boshqacha ko‘rsatma berishdi, deydi marhumning turmush o‘rtog‘i.
Voqea dastlabki tergov xulosasi bilan yopilishini istagan korxona rahbari marhumning ayoliga katta farzandining o‘qishi uchun shartnoma pullarini to‘lashini, ko‘p qavatli uylardan xonadon olib berishini va marhumning voyaga yetmagan farzandlari uchun har oy nafaqa to‘lashni vaʼda qilgan. Ammo vaʼda bajarilmagan.
Turmush o‘rtog‘im vafot etgach, oilamiz qiynalib qoldi. Boisi oilaning yagona boquvchisi erim edi. Korxona rahbari ham nafaqa to‘layman deb ikki oy to‘ladi, katta farzandimning kontrakt pulini to‘lab berdi. Lekin keyingi oydagi to‘lovlarni to‘lashdan bosh tortdi. Qaynona-qaynotangga to‘layapmiz, ular sening plastik kartochkangga tashlab berishdi, deb yolg‘on gapirdi. Shu sabab ish sudgacha yetib keldi, deydi marhumning bevasi.
Sudlanuvchi, “Kavsar Madad” xususiy korxonasi rahbari sudda so‘nggi so‘zini aytar ekan, voqea baxtsiz tasodif sifatida eʼtirof etilishini, unga nisbatan qamoq bilan bog‘liq bo‘lmagan jazo tayinlanishini so‘radi.
Marhum Rustam aka bilan 7-8 yildan beri birga ishlab kelar edik. Sudda uning yaqinlari aytganidek, oramizda gap qochmagan. Tortishuv bo‘lmagan. Biz agar yaxshi munosabatda bo‘lmaganimizda, Rustam aka bu paytgacha biz bilan ishlamagan bo‘lar edi. O‘sha kungi voqea baxtsiz tasodif bo‘ldi. To‘g‘ri, bunda mening ham qisman aybim bor. Shu sabab menga jazo tayinlashda qamoq bilan bog‘liq bo‘lmagan jazo tayinlashingizni so‘rayman, dedi u.
-aJskaChY.jpg)
Sudya Ulug‘bek Ochilov ishni ko‘rib chiqib, sudlanuvchi — “Kavsar Madad” xususiy korxonasi rahbari Z.B.ni Jinoyat kodeksining 257-moddasi 2-qismi “a” bandi (mehnatni muhofaza qilish qoidalarini buzish odam o‘limiga olib kelsa) bilan aybdor deb topib, sudlanuvchiga bir yil muddatga tadbirkorlik faoliyati bilan shug‘ullanish huquqini cheklab, 2 yil muddatga ozodlikdan mahrum qilish jazosini tayinladi.
Izoh (0)