AQSH prezidenti Donald Tramp Meksika prezidenti Klaudiya Sheynbaum bilan telefon orqali suhbat qildi.
Sheynbaumning ma’lum qilishicha, ushbu suhbatdan so‘ng Vashington Meksika uchun bojlarni bir oyga to‘xtatishini e’lon qildi.
Prezident Tramp bilan munosabatlarimiz va suverenitetimizga katta hurmat ko‘rsatilgan holda yaxshi suhbat o‘tkazdik, bir qator kelishuvlarga erishdik. Bojlar bugundan boshlab bir oyga to‘xtatiladi, deb yozdi u X ijtimoiy tarmog‘ida.
Tramp tomonidan Kanada va Meksikadan import qilinadigan mahsulotlarga 25 foizlik, Xitoydan keltirilgan tovarlarga esa ilgari joriy etilgan yig‘imlarga qo‘shimcha ravishda 10 foizlik boj belgilangan edi. Meksika, Kanada va Xitoydan keltirilgan tovarlarga tariflar 4-fevral kunidan kuchga kirishi kutilayotgandi. Respublikachi bu qarorni noqonuniy migratsiya va sintetik fentanil giyohvand moddasi kontrabandasiga qarshi kurash bilan asoslagan edi.
Sheynbaum va Tramp o‘rtasida erishilgan kelishuv bir necha banddan iborat. Birinchidan, Meksika mamlakatdan AQSHga noqonuniy giyohvand moddalar, xususan fentanil yetkazib berilishining oldini olish maqsadida Milliy gvardiyaning 10 ming nafar askari yordamida zudlik bilan shimoliy chegarani qo‘riqlashni kuchaytiradi. Qo‘shma Shtatlar esa, o‘z navbatida, Meksikaga noqonuniy qurol-yarog‘ yetkazib berilishining oldini olish majburiyatini oladi.
Bugundan boshlab jamoalarimiz ikki yo‘nalishda ish boshlaydi: xavfsizlik va savdo, deya ma’lum qildi Sheynbaum.
Tramp ham o‘zining Truth Social ijtimoiy tarmog‘ida Meksika uchun tariflarni joriy etish bir oyga kechiktirilishini tasdiqladi.
Shu vaqt mobaynida biz davlat kotibi Marko Rubio, moliya vaziri Skott Bessent va savdo vaziri Govard Latnik, shuningdek Meksikaning yuqori martabali vakillari rahbarligida muzokaralar olib boramiz, deb yozdi u.
Tramp Sheynbaum bilan bo‘lgan suhbatni “do‘stona” deb ta’rifladi.
Men prezident Sheynbaum bilan ushbu muzokaralarda ishtirok etish imkoniyatini intiqlik bilan kutmoqdaman, chunki biz ikki davlat o‘rtasida bitimga erishishga harakat qilmoqdamiz, deya qo‘shimcha qildi AQSH prezidenti.
Izoh (0)