“Dehqonobod kaliy zavodi” aksiyadorlik jamiyati tender o‘tkazgani, unda xarid komissiyasi a’zolari tomonidan “Davlat xaridlari to‘g‘risida”gi qonun talablari buzilganiga haqida xabar berilgandi. Jamiyat matbuot xizmati ushbu holat yuzasidan munosabat bildirdi.
Ta’kidlanishicha, 2025-yil ishlab chiqarish ehtiyoji uchun autsorsing asosida yuk tashish xizmatini ko‘rsatuvchi tashkilotni tanlash bo‘yicha tender hujjatiga 2024-yilning 21-noyabr kuni Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasidan xulosa olingan.
“Olingan xulosa bo‘yicha dastlab 2024-yilning 26-noyabr kunida 24121006402455-sonli lot asosida savdoga qo‘yilgan. Savdo jarayoni 2024-yil 14-dekabr kuni yakunlangan. Kelib tushgan takliflarni baholash jarayonida ushbu korxonalardan taqdim qilingan hujjatlarda kamchiliklar bo‘lgani sababli lot diskvalifikatsiya deb topilgan va tizim tomonidan savdo jarayonida g‘olib aniqlanmagan.
Shu sababli ushbu tender hujjati 2-marotaba 2024-yil 18-dekabr kuni 24121006407846-sonli lot asosida savdoga qo‘yilgan. Savdo jarayoni 2025-yil 8-yanvar kunida yakunlangan va elektron tizim (etender.uzex.uz) tomonidan O‘zbekiston respublikasi prezidentining 2024-yil 10-iyuldagi PQ-249-sonli qarori 5-bandi 5-xat boshiga (tender savdolarida bitta tadbirkorlik subyekti ishtirok etgan taqdirda, davlat buyurtmachisi xarid qilish tartib-taomilini hamda tovarlarga (ishlarga, xizmatlarga) oid mezonlarni o‘zgartirmagan holda takroran e’lon joylashtirganda va takroriy tender savdolarining yagona ishtirokchisi ilgari ishtirok etgan tadbirkorlik subyekti bo‘lganda, tender savdolari o‘tkazilgan deb hisoblanadi) asosan kelib tushgan taklif avtomatik tarzda baholash jarayoniga o‘tkazilib, 2025-yil 9-yanvarda xarid komissiyasining elektron bayonnomasi rasmiylashtirilgan. Shu bilan birga, O‘zbekiston Respublikasi Korrupsiyaga qarshi kurashish agentligining 2025-yil 10-yanvardagi taqdimnomasiga asosan xarid komissiyasi bayonnomasi bekor qilingan”, deyiladi munosabatda.
Qayd etilishicha, kelgusida shunga o‘xshash holatlarni yuzaga kelishini oldini olish maqsadida, o‘tkazilgan tender savdosi bo‘yicha hujjatlarni “Davlat xaridlari to‘g‘risida”gi qonun prinsiplariga mosligiga oydinlik kiritish maqsadida vakolatli organlarga murojaat yuborilgan.
Bundan tashqari, shu kunga qadar “Dehqonobod kaliy zavodi” AJ tomonidan amalga oshiriladigan barcha savdo jarayonlari O‘zbekiston Respublikasining “Davlat xaridlari to‘g‘risida”gi O‘RQ-684-sonli qonunining asosiy prinsiplari asosida amalga oshirib kelinayotganini ma’lum qilingan.
Izoh (0)