Raqobatni rivojlantirish va isteʼmolchilar huquqlarini himoya qilish qo‘mitasi tender savdolarida “Raqobat to‘g‘risida”gi qonun talablari buzilganini aniqladi.
Qayd etilishicha, qo‘mitaning Toshkent shahar hududiy boshqarmasi tomonidan o‘tkazilgan o‘rganishlar davomida “Toshkent gidroelektrstansiyalari kaskadi” unitar korxonasi tomonidan maxsus axborot portaliga 4-GES hududida joylashgan OTQ-35kVni boshqa joyga ko‘chirish bo‘yicha boshlang‘ich narxi 958 million so‘mga yaqin bo‘lgan eʼlon joylashtirilgan.
Ushbu maxsus axborot portaliga joylashtirilgan xarid savdosi bo‘yicha belgilangan ishlarni bajarish uchun uchta talabgorlar: Master Engineering Services MCHJ (950 million so‘mlik), Jass Engineering MCHJ (952 million so‘mlik) va “Elektr energo tarmoq qurilish” MCHJ (912 million so‘mlik) tomonidan takliflar kelib tushgani va ushbu tender savdosida buyurtmachi tashkilot (xarid komissiyasi) tomonidan ishtirokchilar takliflarini baholash mezonlarini belgilashda ayrim kamchiliklarga yo‘l qo‘yilgani aniqlangan.
Yuqoridagi holatlardan kelib chiqib, “Toshkent gidroelektrstansiyalari kaskadi” unitar korxonasiga nisbatan “Raqobat to‘g‘risida”gi qonunining 29-moddasi ikkinchi qism, birinchi va uchinchi xatboshisi talablari buzilganligi alomatlari yuzasidan Vazirlar Mahkamasi qarori bilan tasdiqlangan nizomiga asosan belgilangan tartibda ish qo‘zg‘atilib, natijasi bo‘yicha moliyaviy jarima qo‘llanilgan.
Avvalroq narxlarni sunʼiy oshirish yo‘li bilan katta miqdorda daromad olgan “Navoiyazot” AJga nisbatan chora ko‘rilgani to‘g‘risida xabar berilgandi. Mineral o‘g‘itlar bozorida narxlarni asossiz oshirgan “MAXAM-Chirchiq”ga nisbatan ish qo‘zg‘atilgan edi.
Izoh (0)