Toshkentning Chilonzor tumanida AQSHga ishga yuborish uchun 40 ming dollar olgan shaxs ushlandi.
Bosh prokuratura huzuridagi Departamentning Chilonzor tumani bo‘limi va DXX xodimlari hamkorligida o‘tkazilgan tezkor tadbirda fuqaro N.M. fuqaro B.G.ning ishonchiga kirib, unga go‘yoki yuqori lavozimda ishlovchi tanishlari orqali AQSHga borishi uchun viza olib berib, u yerda ish bilan ta’minlashi evaziga 40 ming dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval ham Toshkent va Samarqandda fuqarolarni AQSHga yuborishni va’da qilgan shaxslar qo‘lga olingandi.
AQSHga noqonuniy borish
O‘zbekistondan AQSHga noqonuniy borish bilan bog‘liq firibgarlik holatlari haqida xabar berilishiga qaramay, bunday holatlar tez-tez qayd etilmoqda. Xususan, 2024-yil fevralida AQSHga aldov yo‘li bilan yubormoqchi bo‘lgan yetti kishi ushlandi. Aprel oyida O‘zbekistonning to‘rt hududida AQSHga noqonuniy yo‘llar bilan yuborishni va’da qilgan yana bir necha shaxslar ushlandi. Ular bu maqsadda 14—19 ming dollar atrofida pul talab qilgan.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirgan.
2024-yilda AQSH hukumati 572 o‘zbekni deportatsiya qilgan. Bu undan avvalgi yilga nisbatan 6,5 baravar ko‘p. 2013-yilda 88 kishi, 2022 va 2021-yillarda esa deportatsiya qilingan o‘zbekistonliklar soni mos ravishda 21 va 55 kishini tashkil etgan.
Izoh (0)