Toshkent shahrining Chilonzor tumanida fuqaroni AQSHga, Samarqand viloyatining Qo‘shrabot tumanida esa yana bir fuqaroni Angliyaga ishga yuborishni vaʼda qilgan shaxslar qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Chilonzor tumanida fuqarolar A.N. va D.I. fuqaro A.J.ning ishonchiga kirib, uni tanishlari yordamida aylanma yo‘llar orqali Amerika Qo‘shma Shtatlariga ishga yuborishi evaziga 14 ming dollarni olgan vaqtida ashyoviy dalillar bilan ushlangan.
Qo‘shrabot tumanida fuqaro F.U. fuqarolar Q.H. va S.K.ning ishonchiga kirib, ularni go‘yoki yuqori lavozimda ishlovchi tanishlari yordamida Angliyaga ishga yuborishi evaziga 2 500 dollar va 2,5 mln so‘mni qo‘lga kiritganligi aniqlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq, Namangan va Samarqandda AQSHga ishga yuborishini aytib, pul olganlar ushlangani haqida xabar berilgandi.
Izoh (0)