Qoraqalpog‘iston Respublikasi, Samarqand va Andijon viloyatlarida noqonuniy yo‘llar bilan xorijiy davlatlarga ishga yuborishni vaʼda qilgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Samarqand shahar bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruvda A.Sh. ismli shaxs fuqaro Sh.B. va boshqalarning ishonchiga kirib, ularni Angliya davlatiga ishlash uchun yuborishni vaʼda qilib, evaziga ularning 18 ming dollarni firibgarlik yo‘li bilan qo‘lga kiritgani aniqlangan.
Departamentning Oltinko‘l tuman bo‘limi va DXX xodimlari hamkorligida o‘tkazilgan tezkor tadbirda esa X.T. ismli shaxs fuqaro S.K.ning ishonchiga kirib, uni Kanada davlatiga ishga yuborishi evaziga 3 ming dollarni olgan vaqtida ashyoviy dalillar bilan ushlangan.
Shu kabi, departamentning Qoraqalpog‘iston Respublikasi boshqarmasi va DXX xodimlari hamkorligida o‘tkazilgan tezkor tadbirda I.J. ismli shaxs fuqaro E.X.ni 1,5 ming dollar evaziga Serbiya yoki Bolgariya davlatlariga ishlash uchun viza olib berishini aytib, shundan 500 dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
AQSHga noqonuniy borish
AQSH—Meksika chegarasi orqali Amerikaga kirishga urinayotgan O‘zbekiston fuqarolariga 2023-yilning noyabrida ogohlantirish e’lon qilinib, unda noqonuniy kirayotgan fuqarolar AQSHga qo‘yib yuborilmasligi, immigratsiya ishi hal qilingunga qadar hibsda saqlanishi ma’lum qilingandi.
O‘sha yilning dekabrida AQSHga noqonuniy yo‘llar bilan ketgan 119 nafar o‘zbekistonlik vatanga qaytarilgan edi. 2024-yil mart oyida esa yana 74 nafar o‘zbekistonlik olib kelindi.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirdi.
Izoh (0)