Farg‘ona va Jizzax viloyatlarida fuqarolarni noqonuniy yo‘llar bilan xorijga ishga yuborishni vaʼda qilgan shaxslar qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departamentning Marg‘ilon shahar bo‘limi tomonidan tergovga qadar tekshiruv o‘tkazilgan. Tekshiruvda F.T. ismli shaxs fuqarolar T.X. va M.N.ni Meksika davlati orqali AQSHga ishga yuborishlari evaziga ulardan jami 24 ming dollarni firibgarlik yo‘li bilan qo‘lga kiritgani aniqlangan.
Shuningdek, departament hamda DXXning Jizzax viloyati boshqarmalari tomonidan o‘tkazilgan tezkor tadbirda SH.E. ismli shaxs fuqaro D.SH.ni Turkiya davlati orqali Angliyaga mavsumiy ishga yuborish evaziga 2,5 ming dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
Sentyabr boshida AQSH prezidenti Jo Bayden maʼmuriyati O‘zbekistondan AQSHga odamlarni noqonuniy olib kirishga uringan jinoiy tarmoqni aniqlashga va faoliyatini to‘xtatishga muvaffaq bo‘lgani ma’lum qilingan edi. 11-sentyabr kuni Samarqandda 14 ming dollar evaziga Samarqand—Istanbul—Madrid—Nikaragua yo‘nalishi bilan AQSHga ishga jo‘natishni vaʼda qilgan shaxs qo‘lga olingandi.
Noyabr oxirlarida AQSH Ichki xavfsizlik departamenti AQSH—Meksika chegarasi orqali Amerikaga kirishga urinayotgan fuqarolarni chiqarib yuborish siyosati bo‘yicha o‘zgartirishlarni e’lon qilgandi.
Izoh (0)