AQSH prezidenti Donald Tramp 19-may kuni rossiyalik hamkasbi Vladimir Putin bilan muloqot qilishdan oldin Ukraina prezidenti Vladimir Zelenskiy bilan telefonda gaplashgan. Bu haqda The Wall Street Journal xabar berdi.
Manbalarga ko‘ra, siyosatchilar Putin bilan muloqotdan oldin qisqacha suhbatlashib, o‘zlarining diplomatik strategiyalarini kelishib olgan. Ukraina prezidenti Rossiya rahbari bilan 30 kunlik o‘t ochishni to‘xtatish haqida gaplashishni, Rossiya-Ukraina sammitini uning ishtirokida o‘tkazishni muhokama qilishni so‘ragan.
Zelenskiyning o‘zi amerikalik hamkasbi bilan bo‘lib o‘tgan muloqot tafsilotlarini kechroq oshkor qildi. Unga ko‘ra, Trampni yangi sanksiyalar joriy etish haqida o‘ylashga, agar Rossiya urushni davom ettirish tarafdori bo‘lsa, Ukrainani qo‘llashga chaqirgan.
Men undan Putin bilan suhbatdan oldin bizning ishtirokimizsiz Ukraina bo‘yicha qaror qabul qilmasligini so‘radim. Biz uchun bu prinsipial va juda muhim narsa, dedi siyosatchi.
Ukraina yetakchisi Tramp uchun eng muhimi Kiyev va Moskva o‘rtasida to‘g‘ridan to‘g‘ri muzokaralarga erishish, degan xulosaga keldi. U Moskvadan o‘t ochishni to‘xtatish va ularning keyingi qadamlari qanday bo‘lishi mumkinligi haqida “signallar” kutadi:
Men prezident Trampdan, agar Rossiya tomonining qarashlari Ukraina tomonidan qo‘llab-quvvatlanmasa, bu haqda gaplashish imkoniyatiga ega bo‘lishimizni so‘radim. Shuningdek, AQSH buni aynan Rossiya tomonining urushni tugatishni istamasligi sifatida ko‘rishini xohlaymiz, dedi Ukraina rahbari.
Zelenskiyning ta’kidlashicha, bular faqat umumiy masalalar, shu sababli u hozir jiddiy va kuchli sanksiyalar joriy etish imkoniyatini muhokama qilmoqda. Bundan tashqari, barcha tomonlar — AQSH, Ukraina, Rossiya va Yevropa mamlakatlari o‘rtasida yangi uchrashuv o‘tkazish imkoniyati ko‘rib chiqilmoqda. Ushbu uchrashuv Turkiya, Vatikan yoki Shveysariyada o‘tkazilishi mumkin.
Putin bilan suhbatdan so‘ng Tramp qayta Zelenskiy, Fransiya prezidenti Emmanuel Makron, Italiya bosh vaziri Jorja Meloni, Finlyandiya yetakchisi Aleksandr Stubb, Germaniya kansleri Fridrix Merts va Yevrokomissiya rahbari Ursula fon der Lyayen bilan bir soatdan ortiq muloqot qilgan. Ular nima haqida gaplashganiga aniqlik kiritilmagan.
Tramp va Putin suhbati
19-may kuni AQSH va Rossiya rahbarlari o‘rtasida telefon orqali muloqot bo‘lib o‘tdi. Qo‘ng‘iroqdan oldin vitse-prezident Jey Di Vens suhbat chog‘ida Putindan Ukraina bilan tinchlikka jiddiy kirishish-kirmasligi so‘ralishini aytdi.
Keyinroq Putinning o‘zi suhbat ikki soat davom etganini ma’lum qildi. U suhbatni “ochiq, mazmunli va juda foydali” deb atadi. U Trampga Rossiya va Ukraina o‘rtasidagi to‘g‘ridan to‘g‘ri muzokaralarni qayta tiklashda ishtirok etayotgani uchun minnatdorlik bildirdi.
Shuningdek, Rossiya Ukraina bilan o‘t ochishni to‘xtatishni o‘z ichiga olgan memorandum ustida ishlashga tayyorligini aytdi. Tomonlar barcha tomonlarni qoniqtiradigan kelishuvlarni topishlari kerak.
Putinning memorandum haqidagi bayonotiga Zelenskiy munosabat bildirdi. U Ukraina hozircha bu borada Rossiyadan hech qanday taklif olmagani, Ukraina o‘z hududlarini bermasligini ma’lum qildi.
AQSH rahbari ham suhbat haqida ma’lumot berdi. U Rossiya va Ukraina zudlik bilan o‘t ochishni to‘xtatish va urushni tugatish bo‘yicha muzokaralarni boshlashini aytdi. AQSH prezidenti bu haqda Ukraina prezidenti, Yevropa komissiyasi raisi va boshqa Yevropa yetakchilariga ma’lum qilganini ta’kidladi.
Izoh (0)