AQSH prezidenti Donald Tramp Rossiya prezidenti Vladimir Putin bilan uchrashmaguncha Ukraina bo‘yicha tinchlik muzokaralarida siljish kutilmasligini ma’lum qildi. Bu haqda Reuters xabar berdi.
“Putin bilan uchrashmaganimizcha hech qanday o‘zgarish bo‘lmaydi”, dedi Tramp Abu Dabiga qo‘nishdan oldin Air Force One samolyotida jurnalistlarga.
Sky News’ning qayd etishicha, AQSH prezidenti bu fikrni o‘z samolyotida spagetti va go‘shtli sharchalardan iborat taomni iste’mol qilganidan so‘ng bildirgan.
Bundan avval u Istanbulda bo‘lib o‘tadigan muzokaralarga rossiyalik hamkasbi Vladimir Putin kelmagani sababini aytgandi.
“Agar men bormasam, nega u kelishi kerak? Chunki men bormoqchi emasdim. Men borardim, lekin borishni rejalashtirmadim”, dedi u.
Rossiya prezidenti Vladimir Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Ukraina prezidenti Vladimir Zelenskiy mazkur muzokaralarda Putinni shaxsan kutishini aytdi.
AQSH prezidenti Donald Tramp Rossiya va Ukraina vakillari o‘rtasida uchrashuvlar bo‘lib o‘tishi mumkin bo‘lgan Istanbulga tashrif buyurish imkoniyatini ko‘rib chiqayotganini ma’lum qildi.
AQSHning Ukrainadagi maxsus vakili Kit Kellog agar Rossiya prezidenti Vladimir Putin 15-may kuni Turkiyaga Rossiya va Ukraina o‘rtasidagi uchrashuvga kelsa AQSH prezidenti Donald Tramp ham Istanbulga borishi mumkinligini bildirdi.
Izoh (0)