Malta iyun oyida o‘tkazilgan xalqaro anjumanda Falastin mustaqilligini rasman tan olishni rejalashtirmoqda. Shuningdek, Fransiya ham shunga o‘xshash qaror qabul qilishi mumkin. Bu haqda Times of Malta va Axios nashrlari ma’lum qilmoqda.
Malta bosh vaziri Robert Abela o‘z mamlakati Falastin mustaqilligini tan olishga tayyorlanayotganini bildirdi. Uning aytishicha, rasmiy bayonot 20-iyun kuni Saudiya Arabistoni va Fransiya tomonidan BMT ko‘magida tashkil etiladigan xalqaro anjumanda e’lon qilinadi.
Mosta shahrida o‘tkazilgan siyosiy tadbirda so‘zga chiqqan Robert Abela Falastinni tan olish bo‘yicha qadam aynan mazkur anjumanda qo‘yilishiga ishora qilgan. Nashr ma’lumotlariga ko‘ra, uchrashuv maqsadi ikki davlat tuzish to‘g‘risidagi qarorni ilgari surish bo‘ladi.
Malta allaqachon Falastin elchisini qabul qilgan. O‘tgan yilning aprel oyida Valetta BMT Xavfsizlik kengashida Falastinga tashkilotga to‘la huquqli a’zolik berish uchun ovoz bergan edi. Biroq shu paytgacha Malta Falastin davlatini rasman tan olmagandi.
Malta hukumati bo‘lajak anjumanda faqat o‘zlari emas, boshqa davlatlar ham Falastinni tan olishini ma’lum qilmoqda.
Axios axborot agentligi xabariga ko‘ra, iyun oyida Fransiya ham shunday qaror qabul qilishi mumkin. Prezident Emmanuel Makron aprel oyida France 5 telekanaliga bergan intervyusida Falastinni tan olish yaqin oylar ichida hal qilinadigan masala ekanligini ta’kidlagan edi.
2024-yilda Norvegiya, Irlandiya, Ispaniya, Sloveniya va Armaniston Falastin mustaqilligini tan olganini e’lon qilgan.
Izoh (0)