Italiya bosh vaziri Jorja Melonining Italiyada tug‘ilish darajasini oshirish siyosati barbod bo‘lmoqda, chunki statistik ma’lumotlar mamlakatda tug‘ilish darajasi pasayib borayotganini ko‘rsatmoqda, deb yozadi Times nashri.
Italiya Tug‘ilishni rag‘batlantirish jamg‘armasi rahbari Jiji De Palo Italiyada demografik vaziyatni to‘g‘irlash choralari sifatida “shok terapiyasi”ni o‘tkazish kerakligini ma’lum qildi.
Istat milliy statistika agentligi maʼlumotlariga ko‘ra, 2024-yilning yetti oyi davomida Italiyada tug‘ilish darajasi 4,6 ming bolaga yoki 2,1 foizga kamaygan. Butun 2023-yilda 379 890 italiyalik tug‘ilgan, bu 2008-yildagi inqiroz yiliga nisbatan uchdan bir baravar kam.
Italiyalik ayollar o‘rtacha hisobda bittadan bola tug‘adilar (ko‘rsatkich 1,21), aholi sonini barqaror saqlash uchun esa ushbu ko‘rsatkich ikkita (2,1)ni tashkil etishi kerak. Istat ta’kidlaganidek, Italiyada ko‘plab ayollar birinchi farzandlarini 30 yoshda tug‘adilar va er-xotinlar barqaror ish va uy-joy topish muammolari tufayli oila qurishni kechiktirmoqda.
De Paloning so‘zlariga ko‘ra, Italiyada 18 yoshgacha bo‘lgan bolani boqish uchun taxminan 178 ming yevro kerak bo‘ladi, keyin esa bu bolalar ulg‘ayib, “boshqa mamlakatlar yalpi ichki mahsulotini to‘ldirish uchun ko‘chib ketishadi”.
“Hukumat taraqqiyotga erishmoqda, ammo bu yetarli emas. Italiyaga kompaniyalar, banklar, shaharlar va siyosiy muxolifatni birlashtiradigan tug‘ilish siyosati ‘shok terapiyasi’ kerak”, deydi u.
Italiyaning qarishni o‘rganish agentligi rahbari Roberto Bernabeyning fikricha, o‘rtacha ikki bolalik ko‘rsatkichga qaytish uchun bir necha avlod kerak bo‘ladi, shu bilan birga Italiyada 59 million aholining 1 millioni 90 yoshdan oshgan keksalarni tashkil etadi.
2023-yilda Italiya tug‘ilishni qo‘llab-quvvatlash chora-tadbirlari, jumladan, ikki yoki undan ortiq bolali ishlaydigan onalar uchun ijtimoiy to‘lovlarni kamaytirish uchun 1 milliard yevro ajratgan.
Sentyabr oyida Yevropa Ittifoqida (EI) tirik tug‘ilganlar soni 1960-yildan beri birinchi marta 4 milliondan kamayganini, 2022-yilda esa atigi 3,88 million chaqaloq tug‘ilganini xabar qilingan edi. YIda tug‘ilishning eng past ko‘rsatkichlari Malta (1,08), Ispaniya (1,16), Italiya (1,24), Gretsiya (1,32) va Kiprda (1,37) qayd etilgan.
Izoh (0)